УИХ дахь АН-ын бүлгийн хуралдаан өндөрлөлөө.  Тус бүлгийн хуралдаанаар хэд хэдэн асуудлыг хэлэлцэн, гишүүд нэгдсэн байр суурьт хүрсэн байна. Хуралдаанаар хэлэлцсэн асуудлын талаар АН-ын бүлгийн дэд дарга С.Одонтуяа, УИХ-ын гишүүн  Ш.Түвдэндорж нар мэдээлэл  хийлээ. АН-ын бүлгийн хуралдаан Ерөнхий сайд Ч.Сайханбилэг оролцож мэдээлэл хийсэн юм.

Үндсэн хуулийн өөрчлөлтийн талаар ард иргэдээс авсан судалгааны талаар бүлгийн гишүүдэд танилцуулжээ. Уг судалгааг 2000 орчим иргэдээс авсан байна. Судалгаагаар Үндсэн хуулийн зарим зүйлийг өөрчлөх нь зөв үү гэдэгт судалгаанд оролцсон иргэдийн 72 хувь нь зөв гэж хариулжээ. Түүнчлэн Үндсэн хуулийн өөрчлөлтийн талаар ард түмнээсээ асуух нь зөв үү гэсэн  асуултад иргэдийн 80 хувь нь дэмжсэн хариу өгчээ.

 Сумын засаг даргыг олонх болсон улс төрийн намуудаас биш иргэдийн дундаас нэр дэвшүүлж сумын нийт иргэдийн саналаар сонгодог болох  санал 91.8 хувийн дэмжлэг авсан байна.

УИХ-ын гишүүдийн 25 хувь нь гарын үсэг зурж Ерөнхий сайдыг огцруулах асуудлыг хэлэлцдэг одоогийн тогтолцоог халж 51 хувь болгон өөрчилж Засгийн газрыг тогтвортой байдлыг хангах гэсэн саналыг судалгаанд оролцсон иргэдийн  71 хувь нь зөв гэж үзжээ. Засгийн газрын гишүүнийг УИХ томилж чөлөөлдөг. УИХ-ын гишүүн Засгийн газрын гишүүнийг огцруулах саналыг өргөн барьдаг нь буруу. Тиймээс Ерөнхий сайд Засгийн газрын гишүүдээ өөрөө томилж чөлөөлдөг болгож өөрчлөх саналыг иргэдийн 54 хувь дэмжсэн байна.

Шүүх прокурорын үйл ажиллагаа Ерөнхийлөгчөөс хамааралтай байгааг өөрчилж УИХ, Засгийн газрын оролцоог нэмэгдүүлж бие даасан байдлыг нь хангах  саналд судалгаанд оролцогсдын  63 хувь нь зөв гэж үзжээ.  Харин УИХ-ын гишүүдийн тоог нэмэгдүүлэх асуудлыг  иргэдийн 79 хувь нь буруу гэж үзсэн байна. Сонгуулийг таван жилд нэг удаа хийх нь зөв үү гэдэг саналд иргэдийн 51 хувь нь дэмжсэн хариу өгчээ.

АН-ын бүлгээс  УИХ-ын сонгуулийн санал хураалт явуулахтай зэрэгцэн  Ард нийтийн санал асуулга явуулахаар санал нэгдсэн байна. Үндсэн хуульд оруулах  өөрчлөлтүүдийг  нэг бүрчлэн бичээд ард иргэдээс санал асуухаар шийдсэн байна. Энэ нь сонгогчдын сонгуулиа өгөхтэй зэрэгцэх тул Ард нийтийн санал асуулга гэж дахин зардал гаргалгүй шийдэж болно гэж үзжээ.

Тэд мэдээлэл хийснийхээ дараа АН-ын бүлгийн дэд дарга С.Одонтуяа сэтгүүлчдийн сонирхсон асуултад хариулав.

-Санал асуулгын судалгаа ямар хүрээг хамарсан бол. Хаанаас энэ судалгааг явуулсан бэ?

-Судалгааг ямар компани хийсэн талаар мэдэхгүй байна. Миний ойлгож байгаагаар 2000 орчим хүнээс авсан юм шиг байна. Судалгаан дээр гол, гол дүгнэлтүүд гарсан. Энэ нь АН-ын цаашид ярих гол луужин болж байна гэсэн үг.

-Улс төрийн намуудын тухай хуулийг хэлэлцэнэ гэхээр Сонгуулийн тухай хуулийг хэлэлцэж амжих юм уу?

-Сонгуулийн хууль дээр хэд хэдэн удаа ажлын хэсэг уулзсан. Энэ уулзалтаас санал тоолох автомат машин, бусад сонгуулийг хамт явуулах гэсэн хоёр асуудал дээр санал нийлэхгүй  байна. Энэ асуудал нэг тийш шийдэгдэхгүй бол Сонгуулийн хууль өөрчлөгдөхгүй байх магадлал өндөр. Автомат машинд итгэхгүй бол бүх намын бүлгүүдийг суулгаж байгаад, хэвлэлийнхний өмнө тест явуулаад үзэж болно. Ер нь автомат машин ашиглаж сонгуулиар гарч ирчхээд одоо энэ машин буруу гээд яриад сууж байх нь хэр зөв зүйтэй асуудал юм бол. Харин хяналтын тооллогын тоог нэмж болох юм гэдэг дээр намын бүлгүүд санал нийлж байгаа юм.

Н.Энх