Туркийн сөнөөгч онгоцны дайралтад өртөж Сирид сүйрсэн Оросын байлдааны “Су 24” онгоцны хар хайрцгийн мэдээллийг тайлах боломжгүй хэмээн “www.obozrevatel.com” мэдээллээ. ОХУ-ын Зэвсэгт хүчний нислэгийн аюулгүй байдал хариуцсан дэслэгч генерал Сергей Байнетов “Су 24 онгоцны хар хайрцаг их гэмтсэн учир мэдээллийг тайлах боломжгүй байна. Хар хайрцгийн 16 микросхемтэй чипийн 13 нь устсан. Үлдсэн гурван нь их гэмтэлтэй байгааг тогтоосон. Шинжээчид бүхий л хүчээ дайчилж буй ч мэдээллийг тайлах боломжгүй гэх дүгнэлтийг гаргаад байна” гэж хэлжээ.

Оросын шинжээчид өнгөрсөн баасан гаригт онгоцны хар хайрцгийг задалж, мэдээллийг тайлах гэж оролдсон юм. Энэхүү үйл явцыг “Россия 24” телевиз шууд дамжуулсан билээ. ОХУ-ын Батлан хамгаалах яам мэдээллийг тайлах ажилд Британийн шинжээчдээс туслалцаа хүсчээ.

Б.Дэлгэрцэцэг