Ипотекийн зээл олголт зогссон, зогсоогүй хэмээн улстөрчид талцсаар байгаа. Ямартай банкууд 8 хувийн зээлийн олголтыг  Үл хөдлөх барьцааны тухай хуульд  хийсэн ҮХЦ-ийн дүгнэлттэй холбогдуулан зогсоож байгаагаа мэдэгдсэн. Эдийн засгийн байнгын хорооны хуралдаанаар энэ талаар Монгол банкны удирдлагууд мэдээлэл хийхэд “Ц.Нямдорж гишүүн 8 хувийн зээлээс бултахгүй шүү, банкууд. Эрх баригчид ч амлалтаа буцаж, бултаж байна” хэмээн ширүүхэн хэлж байлаа.  Үүнтэй холбогдуулан УИХ-ын дарга З.Энхболд цахим хуудсаараа дамжуулан олон нийтэд байр сууриа илэрхийлжээ.  Тэрээр "Нямдорж гишүүн 8 хувь зээлийг сонгуулийн сурталчилгаа гэж ойлгодог тул хүчингүй болгоход оролцсон юм шиг ойлгогдохоор үг хэллээ. АН 8 хувь зээлийг иргэдээ байртай, ажилтай байлгах, барилгын салбараа өөд татах боломж л гэж санаачилж ҮХЦ-ээс зогсоох хүртэл хэрэгжүүлж ирлээ. 76000 айл байртай болжээ. Удахгүй УИХ хууль баталж 8 хувь ипотекийн зээлээ сэргээнэ  " жиргэсэн байна.

УИХ-ын нэр бүхий  гишүүн хууль санаачлах бүрэн эрхийнхээ хүрээнд Иргэний хуульд зохих өөрчлөлт оруулахаар төсөл боловсруулаад    Засгийн газраас санал авахаар өгсөн аж. Засгаас санал ирсний дараа хуулийн  төслөө УИХ-д өргөн барих юм.  

Н.Нягт