УИХ-ын сонгуулийн тухай хуулийг хэлэлцэж байна. Ажлын хэсгийн гаргасан саналаар санал хураалт явагдаж байгаа юм.  Сонгуулийн саналын хуудсыг автомат машинаар тоолсны дараа хяналтын тооллогыг  50 хувьд нь явуулах санал дэмжигдлээ. Мөн  Пропорцианалиар гишүүдийг эрэмбэлэхдээ гурван хүн тутмын нэг нь эмэгтэй байна гэсэн заалт ажлын хэсэг дээр дэмжигдээгүй байна.  “Улс төрд эмэгтэйчүүдийг олноор оролцох боломжийг бий болгооч ээ” гэдгийг санал гаргасан М.Батчимэг гишүүн хэлж байлаа.  

Нам эвслийн жагсаалтаар гаргах  нэр дэвшигчдийн нэрийг саналын хуудсанд бичнэ гэсэн санал байнгын хорооны дэмжлэгийг аваагүй байна. СЕХ-ноос дээрх нэрсийг бичвэл саналын хуудас 4 м урт жагсаалт  болно хэмээн эсэргүүцэж байгаа аж.  “Сонгогч бүр саналын хуудсаа авахдаа намын жагсаалтаар нэр дэвшиж байгаа эрхмүүдийн нэрийг сонгогчдод  өгч болдоггүй юм уу” хэмээн гишүүн Д.Лүндээжанцан санал гаргаж байлаа. Гишүүн О.Баасанхүү “Намын жагсаалтын ард хэн ч гарч ирж болно. Нууц амраг, эх орноосоо урвасан хүн ч гарч ирээд байна. Хэрвээ энэ санал дээр унавал манай бүлэг завсарлага авна” хэмээсэн юм.

УИХ-ын гишүүн С.Баярцогт:

-Иргэдтэй уулзахад намын нэрийн ард нуугдсан асуудлыг ярьдаг. Дэлхий нийтээрээ хэрэглэдэг жагсаалт дээр хаалттай нэрийн жагсаалтаар явбал нэрсийн жагсаалт тавь. Техникийн хүндрэлийг зохицуулах арга хэмжээ авах хэрэгтэй.

УИХ-ын гишүүн Г.Уянга:

-СЕХ техникийн хүндрэл яриад байгаа. Техникийн хүндрэл ардчилалыг боомилох систем байж болохгүй. Нэг метр цааснаас болж асуудлаа хойшлуулж болохгүй. Үндсэн хуулийн цэц рүү гаргавал  хууль үр дүнгүй болно. Намд санал өгөхгүй гээд олон саналын хуудас хүчингүй болдог.

УИХ-ын гишүүн Н.Энхболд:

-Намын жагсаалтаар сонгогдох хүмүүсийн нэрийг ил гаргана. Нэр нуухгүй. Ил байна.  Ойлголт буруу байхаар боллоо.

Чуулганы хуралдаан үргэлжилж байна.

Н.Энх