Яармагийн гүүрэн дээр осол гаргаж, багагүй хэмжээний хохирол учруулсан нийтийн тээврийн үйлчилгээ эрхлэгчдэд арга хэмжээ авчээ. Нийслэлийн Тээврийн газраас “Сутайн буянт” ХХК-ийг 250.000 төгрөгөөр, захирал болон инженер техникийн ажилчдыг 60.000 хүртэлх төгрөгөөр торгосон байна. Мөн Нийтийн тээврийн үйлчилгээг эрхлэн гүйцэтгэх, гүйцэтгүүлэх гэрээний 6.13 дэх буюу “Хүний амь нас хохироосон, зам тээврийн осолыг хоёр сард хоёр буюу түүнээс дээш удаа гаргасан бол үүрэг гүйцэтгүүлэгчийн санаачилгаар гаралтын тоог таваас доошгүйгээр бууруулах шийдвэр гаргаж болно” гэсэн заалтын дагуу дээрх компанийн нийт гаралтыг таваар цөөрүүлэх шийдвэр гаргажээ. 

Тус ослын улмаас Яармагийн гүүрийг түр хааж, нийслэлийн төсвөөс 77 сая төгрөг гаргаж гүүрийг засварласан юм.

Дашрамд дуулгахад нийслэлийн Тээврийн газар, Замын цагдаагийн газар хамтран нэгдүгээр эгнээ, автобусны зогсоолуудыг хувийн автомашинуудаас чөлөөлөх “Нэгдүгээр эгнээг нийтийн тээвэрт” сэдэвт аяныг Энхтайваны өргөн чөлөөнд энэ сарын 25-ны өдрөөс эхэлжээ. Тус аян ирэх оны хоёрдугаар сарын 29-ны өдрийг хүртэл явагдах аж.