Мексикийн “Синалоа” гэх хар тамхины бүлэглэлийн толгойлогч “Эль Чапо” хочит Хоакин Гузман Лоэраг АНУ-д шилжүүлэн өгөхөөр болсон тухай “www.dailymail.co.uk” мэдээллээ.

Хар тамхины хэрэгт холбогдуулан түүнийг хэд хэдэн удаа баривчилсан ч тэрбээр шоронгоос амжилттай зугтааж чадсан юм. Тэрбээр өнгөрсөн оны долоодугаар сарын 12-ны өдөр чанга дэглэмтэй “Альтиплано” гэх шоронгоос хонгил ухан зугтаасан билээ. Түүнийг саяхан баривчилсан юм.

АНУ-ын тал Эль Чапог өнгөрсөн 2014 оны нэгдүгээр сард шилжүүлэн авах хүсэлт тавьж байжээ. Мексикийн удирдлагууд Эль Чапог дахин зугтахаас сэргийлэн АНУ-д талд шилжүүлэн өгөхөөр болсон байна.

Эль Чапог 1993 оны тавдугаар сард Гватемалаас хар тамхи борлуулсан, дамжуулсан, худалдаалсан хэмээн цагдаагийнхан баривчилсан ч тэрбээр 2001 оны есдүгээр сард оргожээ. Тус улсын цагдаагийнхан 13 жилийн дараа түүнийг дахин баривчилсан ч тэрбээр өнгөрсөн оны дундуур оргосон юм. Тэрбээр оргохын тулд хоригдож байсан шоронгийнхоо удирдлагуудад их хэмжээний авлига өгдөг байсныг мөрдлөгөөр тогтоожээ.

“Синалоа” нь тус улсын хамгийн том хар тамхины бүлэглэл бөгөөд байгуулагдсан цагаасаа Засгийн газрын анхааралд өртсөн юм. Тус бүлэглэлийн жилийн орлого хэдийнэ тэрбум долларыг давсан.

Б.Дэлгэрцэцэг