УИХ-ын чуулганы нэгдсэн хуралдаанаар Иргэний хуульд нэмэлт оруулах тухай болон Үл хөдлөх эд хөрөнгийн барьцааны тухай хуульд өөрчлөлт оруулах тухай хуулийн төслүүдийг хэлэлцэж байна. Хэлэлцэж байгаа асуудалтай холбогдуулан гишүүд ажлын хэсгийнхэнд асуулт тавьж хариулт авч, саналаа хэлж байгаа юм.

УИХ-ын гишүүн Ц.Нямдорж:

-Энэ төслийг цааш хэлэлцүүлээд гаргана биз дээ. Би ипотектэй холбоотой асуудлаар байр сууриа илэрхийлсэн. Би бол Монголын 1 номерын хүчирхэг хүн юм билээ. 70 мянган хүний орон сууцны зээлийг зогсоож, хүссэн шийдвэрээ Цэцээс гаргуулж чаддаг мундаг хүн байна, би. Миний нэрийг өндөрт өргөж байгаа хүмүүст баярлалаа. Би М.Энхсайханы ярилцлагыг хэлье. Засгийн газарт ипотекийн зээлийг олгох мөнгө байхгүй гэсэн байна. Та нар мөнгөгүй болчихоод л 8 хувийн зээлийг зогсоочихсон шүү дээ. Хөгжлийн банкнаас олгож байгаа зээлийн хүү арилжааны зээлийн хүүнээс бага байна гэж заасан. Гэтэл Н.Алтанхуягийн Засгийн газар зөвхөн Хөгжлийн банкнаас 6 хувийн хүүтэй зээл олгоно гэдгийг арилжааны банкуудаар олгохоор болсон. Үндсэн хуулийн Цэцийн шийдвэр ипотекийн зээлтэй ямар ч холбоо байхгүй.

УИХ-ын дарга З.Энхболд:

МАН Засгийн эрх барьж байхдаа ипотекийг санхүүжүүлнэ гэж шийдвэр гаргасан байдаг. Тэр шийдвэрээр нь 400 орчим айл л хамрагдан байдаг. Тиймээс АН олон хүнийг орон сууцтай болгох зорилгоор өөрчилсөн. МАН-ынхан заавал улсын төсвөөс татаас өгнө гэж ойлгоод байх юм. Энэ тогтолцоо болохгүй. Засгийн газрын гишүүн М.Энхсайхан тийм зүйл ярьж байгаа бол халах хэрэгтэй. М.Энхсайхан МАН-тай хамтаръя гэж явж байгаа юм билээ гэв. 

УИХ-ын гишүүн Х.Тэмүүжин:

“Үндсэн хуулийн Цэц баруун тийшээ харж байгаад зүүн тийшээ шийдвэр гаргадаг нохой зантай болчихсон. Бодит байдал дээр банкуудыг эрсдэлтэй алхам руу түлхсэн Цэцийн шийдвэр" гэв.

Чуулганы хуралдаан үргэлжилж байна.

Н.Энх