УИХ-ын чуулганы өнөөдрийн нэгдсэн хуралдаанаар Ерөнхийлөгчийн санаачилсан Улс төрийн намуудын тухай хуулийн шинэчилсан найруулгыг хэлэлцэж, гишүүд асуулт асууж, ажлын хэсгээс хариултаа авч байна. Энэ үеэр УИХ-ын гишүүн С.Бямбацогт УИХ-ын дарга З.Энхболдод зориулж "зохиосон" шүлгээ уншиж сонирхуулав. Тэрбээр ардын уран зохиолч Ш.Сүрэнжавын Багш найраглалаас санаа авч, спикерт зориулсан шүлгээ "зохиожээ".

Түүний шүлгийг сонирхуулъя.

АН-ын дарга маань:

Байшин зардаг барилгачин

Барьцгүй залдаг илтгэгч

Түшээдийг загнадаг дарга

Түмнийг гонсойлгодог горьдоогч

Цэцийн дээр гарсан хөх тэнгэр

Телевизийг удирддаг удирдлага

Засгийг мэддэг Ерөнхий сайд

Зээл мэддэг банкир болсон

Хурлын дэг сахиулагч биш

Хуулийг зоргоороо өөрчлөгч болсон

Бүхнийг чадагч, бүхнийг мэдэгч

Бие жижиг ч бэлчээр томтой

Бүгдийг захирагч хаан болсон.

Ингэж бүхнийг чаддаг, мэддэг болсон намын даргын эрх үүрэг, хариуцлагыг энэ хуулиар хэрхэн зохицуулж байгааг тэрбээр тодруулсан юм. Түүний шүлгийн хариуд УИХ-ын дарга З.Энхболд "манай гишүүдийн шинэ авьяас илэрч, шүлэг зохиодог боллоо. Болор цомын бүртгэл эхэлснийг Батбаяр гишүүн сануулж байна" хэмээн ёжилж, шуумалзав.

В.Бат