Монголын томоохон их дэлгүүрийн төлөөлөл бол “Номин Холдинг” компанийн Улсын их дэлгүүр. Үүнтэй хэн ч маргахгүй. Гэвч тус газрын үйлчилгээтэй холбоотой санал гомдол хэрэглэгчдийн дунд тасардаггүй.

Саяхан нэгэн хэрэглэгч өөрийн цахим хуудаснаа “Номин” хэрэглэгчдээ луйварддаг уу” гэх мэдээлэл нийтэлжээ. Тэрээр Улсын их дэлгүүрээс 90800 төгрөгийн худалдан авалт хийж НӨАТ-ын бар кодтой баримтыг хэвлүүлсэн байна. Ингээд баримтыг хартал 90800 төгрөгийн 5 хувьд бонус тооцож нийт үнийн дүнгээс хасчээ.

Өөрөөр хэлбэл, тухайн үйлчлүүлэгчийн өөрийн мөнгөнөөс 4540 төгрөгийг бонус болгож “Номин” карт руу нь шилжүүлсэн байна. Ингэж шилжүүлэхдээ үйлчлүүлэгчээс бонусаа ашиглах эсвэл картандаа үлдээх эсэхийг кассчин лавлахад үйлчлүүлэгч картандаа үлдээхээр шийдсэн гэх.

Урамшууллын карт үйлчлүүлэгчийг худалдан авалт хийсний төлөө өөрийнх нь халааснаас мөнгө гаргаж хөнгөлөлт эдлүүлэх биш тухайн компаниас гарах зардал баймаар.

Гэвч тэрээр яагаад миний мөнгийг урамшууллын картанд үлдээж байгаа юм бол гэх эргэлзээ төрчээ. Угтаа бол урамшууллын карт үйлчлүүлэгчийг худалдан авалт хийсний төлөө өөрийнх нь халааснаас мөнгө гаргаж хөнгөлөлт эдлүүлэх биш тухайн компаниас гарах зардал баймаар.

Нэг үгээр хэлбэл, өөрийнх нь мөнгийг бонус болгож картанд хийж хуримтлуулаад дараа нь үйлчлүүлэхэд тэр картыг уншуулж үнийн тодорхой хувийг хөнгөлнө гэдэг юу гэсэн үг вэ.

-Яг үнэндээ, бонус гэж чиний мөнгийг өөрт чинь эргүүлж өгөөд байна-

Энэ асуудлаар бид үйлчлүүлэгч Б-тэй уулзаж, зарим зүйлийг тодрууллаа. Тэрээр “Номин Холдинг” ХХК-ийн нэр төрд халдах гэж биш хэрэглэгчдийг төөрөгдүүлсэн асуудалд тайлбар хүсч цахим хуудаснаа ийн бичсэн гэдгээ онцолсон юм.

Б энэ сарын 16-ны өдөр Улсын их дэлгүүрээр хуриманд зориулж дурсгалын зүйл худалдан авчээ. Тэрээр хэлэхдээ “ “Их дэлгүүр үйлчлүүлэгчиддээ өгдөг хямдралын карт нь яг үнэндээ хууран мэхлэлт юм байна. Номин дэлгүүр хямдруулдаг биш та өөрөө илүү төлбөр Номинд төлж, дараа нь хямдрал хэлбэрээр тэр мөнгөө зарцуулдаг бололтой. Уг нь урамшууллын мөнгө надаас биш тухайн компаниас гармаар юм. Үнэндээ энэ бол бонус биш юм байна. Бонус нэрээр хэрэглэгчээс мөнгө авч үлдчихээд дараа нь энэ чиний бонус шүү гээд чамд өөрийн чинь мөнгийг чамд буцааж өгч байгаа хэрэг юм байна. Үнэхээр ийм юм бол бонус карт гэх хэрэг байна уу. Бонус картаар хүмүүсийг хуурч худалдан авалт хийлгэх шаардлага байна уу. Энийг тайлбарлаач ээ гэж хүсмээр байна” гэлээ.

-Манай бонус карт үйлчүүлэгчид хөнгөлөлт үзүүлдэг-

Ингээд бид түүний баримтыг авч Улсын их дэлгүүрийг зорилоо. Нэг давхарт байрлах бонус картны үйлчилгээ хариуцсан ажилтанд баримтыг үзүүлж эргэлзээтэй асуултад хариулт авахыг хүссэн юм.

“Манай бонус карт бол үйлчүүлэгчид хөнгөлөлт эдлүүлдэг карт. Бид үйлчүүлэгчдээ 3-50 хүртэлх хувийн хөнгөлөлтийг худалдан авалтын үнийн дүнгээс хамаарч бонус картаар нь хөнгөлдөг” гэх хариултыг өглөө. Харин чухам яагаад миний мөнгөөр намайг урамшуулаад байгаа эсэхийг лавлахад “Бид үүнээс илүү мэдээлэл өгөх боломжгүй. Та бүхэн манай сайтаас мэдээлэл, танилцуулгыг авах боломжтой” гэсэн юм.

Харин тус компанийн сайтад бонус картын талаар ингэж мэдээлжээ.

Нэг бонус нь нэг төгрөгтэй тэнцэнэ. Мөн 1-10 хувийн бонус авах эрхтэй.
Худалдан авалтын хуримтлагдах дүнд барааны үнээс олгосон бонусыг хассан дүнг тооцох бөгөөд худалдан авалтын хуримтлагдах хугацаа нь сүүлийн 2 жилээр тодорхойлогдоно. Жишээ нь: Таны тухайн худалдан авалт хийж буй өдрөөс өмнөх 2 жилийн худалдан авалтын нийлбэр дүн 4 сая төгрөг байвал таны бонус 5 хувиар тооцогдоно. Тухайн өдөр та 200,000 төгрөгийн бараа авах гэж байгаа бол 5 хувиар 10,000 төгрөгийн бонус бодогдож орно. Худалдан авалтын дүн 190,000 төгрөгөөр нэмэгдэнэ. Худалдан авалтын хуримтлагдсан дүнгээс хамааран харгалзах картын хувиар бонус олгоно.

Бонус картыг 3450 төгрөгөөр захиалж, сэргээх шинэчлэхдээ ч мөн адил төгрөг төлөхөөс гадна данс салгахад 3000 төгрөг, пин код солихдоо хүртэл 100 төгрөг төлөх аж.

Барааны үнийн дүнгийн 50 хүртэлх хувьд бонусыг ашиглан төлбөр хийж болно.
Бонусаар төлбөр хийж буй тохиолдолд бонусаар төлсөн төлбөрийг анхны үнийн дүнгээс хасна. Хассаны дараах үлдэгдэлд бонус бодогдож картын дансанд орно. Жишээ нь: Таны дансанд 80,000 төгрөгийн бонус байна. Та 200,000 төгрөгийн бараа авах гэж байгаа бол бүх бонусаа ашиглах эрхтэй. Таны дансанд 120.000 төгрөгөөс бонус бодогдож орно.

Мөн бонус картыг 3450 төгрөгөөр захиалж, сэргээх шинэчлэхдээ ч мөн адил төгрөг төлөхөөс гадна данс салгахад 3000 төгрөг, пин код солихдоо хүртэл 100 төгрөг төлөх аж.

Тэгэхээр зүйд нийцэх нь “Номин Холдинг” бонусыг өөрийн байгууллагаас үйлчүүлэгчид олгохоор ойлгогдож байгаа юм. Гэвч бодит байдал дээр үйлчүүлэгчдийг төөрөгдүүлж, өөрсдийнх нь халаасаар урамшуулж байгаа нь залжин арга мэт.

-Үнийн дүн зөрүүтэй байсан нь НӨАТ-д бүртгэх аргагүй болжээ-

Дээрх байдлаас болоод үйлчлүүлэгчид үүссэн нэгэн асуудал нь НӨАТ-ын баримтаа  www.e-barimt.mn сайтад бүртгүүлж чадаагүй явдал аж. Тодруулбал, “Үнийн дүн зөрүүтэй байна” хэмээгээд бүртгэгдээгүй байна. Тиймээс бид эл асуудал болон худалдан авсан барааны нэг бүрийн үнэ дээр 10 хувийн НӨАТ нэмж байгаа зэрэг иргэдийг бухимдуулсан асуудлаар Татварын Ерөнхий газрын НӨАТ-ын Стратегийн албаны захирал Н.Энхбатаас тодрууллаа.

Тэрээр “НӨАТ тооцох тооцохгүй бараа гэж бий. НӨАТ тооцох барааг нэг бүрийн үнэ дээр 10 хувиар нэмж тооцох ёстой. Өөр ямар нэгэн дүн байхгүй. Хуулиндаа тэгж заасан. Харин урамшууллыг тооцохдоо тухайн байгууллагууд хуулийн хүрээнд нэгж үнэ дээр НӨАТ нэмсэнээс биш бодит барааны үнийн дүнгээс тооцох хасах ёстой” гэлээ.

 Урамшууллыг тооцохдоо тухайн байгууллагууд хуулийн хүрээнд нэгж үнэ дээр НӨАТ нэмсэнээс биш бодит барааны үнийн дүнгээс тооцох хасах ёстой

Мөн тэрээр үйлчлүүлэгч Б-ийн зарлагын баримтыг үзээд “Эднийх нийт НӨАТ нэмсэн үнээсээ урамшууллаа тооцсон байна. Энэ бол буруу юм” гэв.

Ингээд “Номин Холдинг” бонус нэрээр иргэдийг төөрөгдүүлснээс гадна НӨАТ-ыг буруу тооцож, сугалаанд оролцох боломжгүй болгож орхисон байгаа юм.

-Лангуун дээрх кассан дээр ирэхэд нэмэгддэг-

"Номин"-гийн балаг үүгээр ч зогсохгүй аж.  Нэгэн иргэн энэ асуудалтай холбогдуулж“Ер нь хямдрал бонус гэж маркетингийн тархи угаалтын арга. “Номин” бол топ үнэтэй газар. 3500 төгрөгийн үнэтэй алимыг 5900 төгрөгөөр зарна. Тэгээд 3% гэж хуурна. Яагаад богино хугацаанд ингэж томорч сүлжээ үүсгэж чадсаны хариулт энэ байх. Хүүгүй мөнгийг үнэгүй эргэлдүүлэх. Бас бус арга зөндөө байгаа наад дэлгүүрт чинь. Аймаар луйварчин газар” гэх гомдол бичжээ.

Яг ийм үнийг хэт хөөрөгдсөн, кассан дээрээ очихоор үнэ нэмэгдсэн байдаг явдал өмнө нэг бус удаа гарч улмаар ШӨХТГ-аас нэг тэрбум 168 сая төгрөгөөр торгосон байдаг.

Ганцхан жишээ дурдвал, 2014 оны дөрөвдүгээр сард Их дэлгүүрийн Номин супермаркетаар үйлчлүүлсэн иргэний төлбөр өөрийнх нь тооцоолсноос өндөр гарч байв. Энэ талаар бидэнд мэдээлж байсан бөгөөд тэрээр дөрвөн ширхэг усны сав аваад кассчин дээр иртэл 1000-3000 төгрөгийн илүү үнэтэй бодогджээ. Тодруулбал, 4999 гэж байсан усны сав нь 7999 болж 5999 төгрөг гэж байсан нь 6999 төгрөг болсон  байна. Харин эл асуудлыг тайлбарлахдаа “Шинэ барааныхаа үнийг сольж амжаагүй байна” гэсэн байдаг.