Шүүх байгуулах тухай хуулиар Иргэн, Эрүүгийн хэргийн давж заалдах шатны шүүхийг гурван аймгийн дунд, Иргэн, Эрүүгийн хэргийн анхан шатны шүүхийг гурван дүүргийн дунд байгуулсан нь Үндсэн хуульд бэхжүүлсэн засаг захиргаа, нутаг дэвсгэрийн харьяаллын зарчмаар зохион байгуулагдах Монгол Улсын шүүхийн үндсэн тогтолцоог үгүйсгэж, иргэний үндсэн эрхийг баталгаатай эдлүүлэх, төрийн үйлчилгээг иргэдэд ойртуулах Үндсэн хуулийн суурь зарчмыг алдагдуулж улмаар Монгол Улсын Үндсэн хуулийн холбогдох заалтыг зөрчсөн гэсэн дүгнэлтийг Цэц өмнөх дунд суудлын хуралдаанаас гаргасан билээ.

Монгол Улсын Их Хурлаас уг дүгнэлтийг хүлээн зөвшөөрч гаргасан тогтоолд Монгол Улсын Ерөнхийлөгч хориг тавьсан бөгөөд ийнхүү хориг тавихдаа Үндсэн хууль зөрчсөн тухай дүгнэлтийг хөндөөгүй, зөвхөн эдийн засаг, төсвийн хүндрэлтэй байдал болон богино хугацаанд хуулийн өөрчлөлтийг хэрэгжүүлэх боломж хомс байгааг дурдсан байв.

Цэц дээрх маргааныг Их суудлын өнөөдрийн хуралдаанаар дахин хянаж, эцэслэн шийдвэрлэхдээ, Үндсэн хууль зөрчсөн хэмээн үзэж Шүүх байгуулах тухай хуулийн Үндсэн хууль зөрчсөн заалтуудыг 2016 оны 6 дугаар сарын 1-ний өдрөөс эхлэн хүчингүй болголоо.