ҮХЦ-ийн дарга Ж.Амарсанаа үүрэгт ажлаас нь чөлөөлөх асуудлыг УИХ хэлэлцэж байгаа. Цэцийг гишүүд “Лексус-570”  авлигад авсан хэмээн шүүмжилдэг.    Үүнтэй холбогдуулан Цэцийн дарга Ж.Амарсанаа сэтгүүлчдэд мэдээлэл хийхдээ “Би дээрээсээ дөрөв дэх хүн. Яагаад дээрээсээ дөрөвдүгээр хүн эксел унаад, дүүргийн дарга жийптэй хажуугаар өнгөрдөг юм. Би “Лексус-570 унамаар байна. Унаж л байх хэрэгтэй шүү дээ” хэмээсэн нь олны дургүйцлийг хүргэлээ. Монгол Улсад албан тушаалтнуудыг нэгдүгээр, хоёрдугаар, гуравдугаар, дөрөвдүгээр хүн гэж хуульчилсан нэг ч хууль, дүрэм байхгүй.

Манай парламентат засаглалтай улс. Тиймээс иргэн бүр хуулиа мөрдөнө. Төрийн тэргүүнээсээ эхлээд Монгол Улсынх иргэн бүр Үндсэн хуулиа дээдлэх ёстой.  Түүнээс бус Үндсэн хуулийн манаач хэмээн өргөмжлөгддөг Цэцийн гишүүд тусдаа эрэмбэтэй байх ёстой, тэднийг тахин шүтэх учиртай гэсэн дүрэм хаана ч байхгүй. Тэд ердөө л төрийн албан хаагч. Төрийн жирийн нэгэн албан хаагч эрх мэдлийнхээ хүрээнд “Би “Лексус-570” унамаар байна, иргэдийн унаж байгаа суудлын тэрэг надад зохихгүй гэдэг утгаар ярьж байгаа нь цаанаа “авлига” нэхээд байгаа мэт.

Үндсэн хуулийн Цэц ипотекийн найман хувийн хүүтэй зээлийг зогсоон гацааснаар хэдэн мянган айл шинэ жилийн баяраа шинэ байрандаа тэмдэглэж чадаагүй. Цэцийн ипотекийн зээлийг хаасан шийдвэрийг УИХ энэ сарын 19-нд хууль гаргаж байж сэргээсэн билээ.

Төрийн шийдвэр иргэдэд бага хүүтэй зээлээр орон сууцанд хамрагдах нь чухал болохоос  Цэцийн дарга Ж.Амарсанаа жийпгүй байгаа нь асуудал биш. Түүнээс бус иргэн Ж.Амарсанаа улсын биш хувийн мөнгөөрөө “Лексус-570” унана уу, пирусээ унана уу падгүй. Харин албан тушаал, эрх мэдлээ ашиглан төсвийн мөнгөөр тансаглах хориотой.