”Монголбанк, “Тэнхлэг зууч” компанитай хамтран энэ оны нэгдүгээр сарын “Орон сууцны үнийн индекс”-ийг тооцоолон, танилцуулж байна. Энэхүү тооцоо, судалгаанд тухайн сард зах зээлд нийлүүлэгдсэн шинэ, хуучин 5,062 орон сууцны үнийг хамруулсан болно.

Орон сууцны үнийн индекс:

Энэ оны нэгдүгээр сард зах зээлд нийлүүлэгдсэн шинэ болон хуучин орон сууцны үнийн бууралт үргэлжилсэн хэвээр байгаа бөгөөд орон сууцны дундаж үнэ өнгөрсөн оны мөн үеэс 10.4%-иар буурчээ.

2013 оны 1 дүгээр сараас эхлэн орон сууцны үнийн индексийг тооцсон бөгөөд орон сууцны үнийн жилийн өсөлт 2014 оны 3 дугаар сард хамгийн өндөр буюу 23.7%-тай гарсан байна. 2014 оны 12 дугаар сараас орон сууцны үнэ (өмнөх оны мөн үетэй харьцуулахад) буурч эхэлсэн бөгөөд орон сууцны үнийн бууралт үргэлжилсэн хэвээр байна. Тухайлбал, БЗД-ийн “Баянмонгол” хотхонд 2015 оны нэгдүгээр сард 1 м2 дундаж үнэ 2,187,000 төгрөг байсан бол 2016 оны нэгдүгээр сарын байдлаар 1,901,000 төгрөг болж, өмнөх оны мөн үеэс 13.1%-иар буурсан байна.

Шинэ орон сууц:

Шинэ орон сууцны 1м.кв дундаж үнэ нь энэ оны нэгдүгээр сарын байдлаар 2,047,000 төгрөг болж өмнөх сараас 0.2 хувиар, өнгөрсөн оны мөн үеэс 5.3 хувиар тус тус буурсан байна. Сүхбаатар дүүрэгт шинэ орон сууцны 1м.кв-ийн дундаж үнэ хамгийн өндөр байгаа бол Сонгино хайрхан дүүрэгт хамгийн бага байна.

Хуучин орон сууцны үнэ /2 өрөө байр/:

Хуучин 2 өрөө байрны дундаж үнэ нь энэ оны нэгдүгээр сарын байдлаар 83,460,000 төгрөг болж өмнөх сараас 1.0 хувиар, өнгөрсөн оны мөн үеэс 14.6 хувиар тус тус буурсан байна.

Хуучин орон сууцны хувьд Сүхбаатар дүүрэгт хуучин 2 өрөө байрны дундаж үнэ хамгийн өндөр байгаа бол Сонгино хайрхан дүүрэгт хамгийн бага байна.