Монгол Улсаас БНХАУ-руу мах экспортолох ажил албан ёсоор эхэлжээ. Ажлын эхлэл болгож өчигдөр буюу хоёрдугаар сарын 19-ндУвс аймгийн “Мон-Тува” ХХК Говь-Алтай аймгийн Бургастайн боомтоор дамжуулан Хятад руу 16 тонн хонины мах экспортоллоо.Уг үйл ажиллагаанд Гадаад хэргийн сайд Л.Пүрэвсүрэн, Хүнс,Хөдөө аж ахуйн яамны Төрийн нарийн бичгийн дарга Н.Ариунболд, Монгол Улсаас БНХАУ-д суугаа Онц бөгөөд Бүрэн эрхт Элчин сайд Ц.Сүхбаатар, Говь-Алтай аймгийн Засаг дарга О.Амгаланбаатар нар оролцов.

БНХАУ-ын Чанарын хяналт, шалгалт хорио цээрийн ерөнхий газраас 2015 оны арванхоёрдугаар сард  Монгол Улсын баруун таван аймагт тавьсан үхэр, хонь,  ямааны түүхий махны шүлхийн хоригийг цуцалж, эрүүл болохыг нь хүлээн зөвшөөрсөн. Ингэхдээ Увс, Завхан, Хөвсгөл, Говь-Алтай, Баянхонгор аймгийг малын шүлхий өвчингүй, эрүүл бүс хэмээн албан ёсоор зарлаж, эдгээр аймгуудаас мах экспортлохоор болжээ.

БНХАУ-ын Чанарын хяналт шалгалт, хорио цээрийн ерөнхий газрын Гэрчилгээ, бүртгэлжүүлэлтийн газраас

Завхан аймгийн “Завхан хүнс групп” ХХК,

Хөвсгөл аймгийн “Хөвсгөл мах маркет” ХХК (Монгол эко мах ХХК),

 Увс аймгийн “Мон-тува” ХХК (Грийн грэйс лэнд)-ийн махны үйлдвэрүүдэд бэлтгэсэн үхэр, хонь, ямааны махыг экспортлох зөвшөөрлийг олгосон байна. Баруун таван аймгийн малчид, иргэд мал махаа эдгээр гурван компанийн үйлдвэрт нийлүүлэх боломжтой юм.

Манай улс БНХАУ-ын 13 боомттой хиллэдэг бөгөөд Говь-Алтай аймгийн Бургастайн боомтын хувьд баруун таван аймгийн нутаг дэвсгэртэй хамгийн ойр төдийгүй Хятадын хамгийн өндөр махны хэрэглээтэй муж, аймгуудтай ойр хиллэж байгаагаараа онцлог юм гэж Хүнс, хөдөө аж ахуйн яамнаас мэдээллээ.