УИХ дахь МАН-ын бүлгийн реферант Б.Цогтгэрэл өнөөдөр Үндэсний аудитын газрын үүдэнд гал тавьж, бусдын амь насанд халдах шахлаа. Тэрбээр өөрийнх нь өргөдөлд хариу өгсөнгүй гэж Үндэсний аудитын газрын дарга А.Зангадын дүрсээр сор залж байгаа аж. Үүнийгээ Шинийн 15-ны билигт сайн өдрийг тохиолдуулан сор залах ёслол үйлдлээ гэж тайлбарласан. Гэвч хууль үйлчилдэг улсад Б.Цогтгэрэлийн үйлдэл нь Үндэсний аюулгүй байдлын эсрэг, иргэдийг үймээнд уриалсан гэмт хэрэг юм.

Эрүүгийн хуулийн 177 дугаар зүйлд зандалчлах, 179 дүгээр зүйлд нийтийн эмх замбараагүй байдал бий болгох тухай хуульчилсан байдаг. Эрүүгийн хуулийн 177 дугаар зүйлийн 177.1-д  “Эрх бүхий байгууллага, албан тушаалтнаас тодорхой шийдвэр гаргуулах буюу гаргахаас татгалзуулахад шууд буюу шууд бус нөлөөлөх зорилгоор, олон нийтэд айдас төрүүлэхэд чиглэсэн нийтэд аюултай хүч хэрэглэсэн буюу хэрэглэхээр заналхийлсэн бол арваас дээш арван таван жил хүртэл хугацаагаар хорих ял шийтгэнэ” гэж заасан байдаг. Энэ гэмт хэргийг зохион байгуулалттай бүлэглэл үйлдвэл 20-25 жил хорих, эсвэл цаазаар авах тухай заасан. Мөн Эрүүгийн хуулийн 179 дүгээр зүйлд “Түйвээн үймүүлэх, эвдэн бусниулах, галдан шатаах, эд хөрөнгө устгах, галт зэвсэг, тэсэрч дэлбэрэх бодис хэрэглэх буюу төрийн төлөөлөгчийг зэвсэглэн эсэргүүцэх замаар нийтийн эмх замбараагүй байдлыг зохион байгуулсан, өдөөн турхирсан бол хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл хоёроос таван жил хүртэл хугацаагаар хорих ял шийтгэнэ” гэж заасан.

МАН-ынхан зохион байгуулалттайгаар Үндэсний аудитын газрын даргаар шийдвэр гаргуулахын тулд галдан шатаах байдлаар нийгмийг айдаст автуулж, эмх замбараагүй байдалд уриалан дуудлаа.

Энэ нам түүхэндээ цөөнгүй удаа нийгмийн аюулгүй байдлын эсрэг ноцтой гэмт хэрэг үйлдэж, үймээн самуун дэгдээж байсан. Тэртээ 1937 оны их хэлмэгдүүлэлтийн үед Монголын сүм, хийдүүдийг бүгдийг нь галдан шатааж, сэхээтэн лам нарыг хоморголон хэлмэгдүүлсэн. Энэ үйлдэлдээ өнөөг хүртэл уучлал гуйгаагүй байгаа. 2008 оны долдугаар сарын 1-ний үймээнээр МАХН (МАН)-ын байрыг галдан шатаасан. Улс төр судлаачид МАН-ынхныг өөрийнхөө байрыг галдан шатааж, дараа нь сэргээн засуулсан гэж харддаг. “Долдугаар сарын 1”-ний үймээний үеэр таван хүний алтан амь үрэгдсэн. Үүнээс хойш иргэд олныг хамарсан үймээн самуунаас болгоомжилдог болсон.

Гэтэл МАН-ынхан өнгөрсөн оноос эхлэн сонгуулийн автомат машин, хүний дүрс шатаах зэргээр үймээн самуунд уриалах боллоо. Тэдний энэ үйлдэл даамжирвал эх орноо шатааж ч мэдэхээр байгаа нь нийтэд айдас төрүүлж байна.