ОХУ-д орогнож буй АНУ-ын Тагнуулын газрын экс ажилтан Эдвард Сноудан “Хэрвээ АНУ-ын шүүх шударга хандвал би нутаг буцах болно. Хамгийн чухал нь шүүх хурал нээлттэй болох учиртай. Эдгээр шаардлагыг минь хүлээн авбал би өнөөдөр ч Америкт очиход бэлэн байна” гэж хэлжээ. Тэрбээр өчигдөр Нью Хэмпшир мужид болсон хэлэлцүүлэгт онлайнаар оролцох үеэрээ ийнхүү мэдэгдсэн талаар “AFP” агентлаг мэдээллээ.

Сноудан “Хэрвээ шаардлагатай гэж үзвэл би нууцын зэрэглэлтэй материалыг олон нийтэд задруулж, Вашингтоны булхайг илчлэх болно. Мөн шаардлагатай гэж үзвэл би шүүх хурлын үеэр өөрийгөө болон бусдын эрх ашгийг хамгаалахын тулд зарим материалыг задруулах болно” гэж мэдэгджээ.

Өнгөрсөн 2014 онд АНУ-ын Ерөнхийлөгч Барак Обама экс тагнуулчийг урвагч хэмээн мэдэгдсэн билээ. Мөн Төрийн нарийн бичгийн дарга Жон Керри тагнуулчийг Америкт хөл тавьсан тохиодолд улсаасаа урвасан хэмээн үзэж, шууд баривчлахаа сануулсан юм.

Б.Дэлгэрцэцэг