Засгийн газраас АСЕМ-ын Дээд түвшний 11 дүгээр уулзалт, АСЕМ-ын 20 жилийн ойн арга хэмжээг зохион байгуулах ажлын хүрээнд энэ оны 3 дугаар сарын 1-нийг АСЕМ-ын өдөр болгон зарлаж, улс даяар тэмдэглэн өнгөрүүлэхээр шийдвэрлэсэн байна. Энэ өдөр АСЕМ-ын Мэдээллийн төвийг  МОНЦАМЭ агентлагийн байранд нээж, ГХ-ийн сайд Л.Пүрэвсүрэн сэтгүүлчдийн сонирхсон асуултад хариулсан юм.

-АСЕМ-ын Мэдээллийн төвийн онцлог юу вэ?

-АСЕМ-ын бэлтгэл ажлын асуудлаар тогтмол цагт мэдээлэл өгдөг байх болно. Бусад үед нь АСЕМ-тай холбоотой мэдээлэл тавьж байх юм. Энэ Мэдээллийн төв байнгын ажиллагаатай байна.

-АСЕМ-тай холбоотой  хөрөнгө оруулалт,  гэрээ хэлцэл байгуулагдах уу?

-АСЕМ-ын өмнөхөн бизнесийн форум болно. АСЕМ-ын  гишүүн 51 орны том бизнесүүд ирдэг. Энэ нь том  бизнесүүдэд Монголын зах зээлийг сонирхох боломж олдож байгаа юм. Үүнд манай бизнесийнхэн оролцоно. Аж үйлдвэрийн сайдаар ахлуулан ажлын хэсэг байгаа. Мөн ирэх дөрөвдүгээр сараас эхлэн бэлтгэл ажлын хүрээнд зохиогдох арга хэмжээнд 5000 гаруй хүн оролцоно. Тэд Монголтой танилцахаас гадна тодорхой хэмжээгээр бизнес нь чиглэнэ. Энэ Дээд арга хэмжээг амжилттай зохион байгуулснаар цаашид олон улсын том хэмжээний арга хэмжээг зохион байгуулж чаддагаа бусад оронд таниулж, нэр хүндтэй болох юм. 2016-2018 онд Монгол Улс хүлээж авах боломжтой олон улсын хурал зөвлөгөөн, спорт, урлаг соёлын арга хэмжээ баталсан. Энэ дагуу бусад салбарынхантай ажиллана. Зуны улиралд  жуулчид их ирдэг. Энэ үеэр зочид буудлынх нь үнэ өндөр болчихсон, бусад улиралд аялал жуучлалын салбар эзгүйддэг. Тиймээс бид олон улсын хурал зөвлөгөөн зохион байгуулснаар аялал жуулчлалын салбар руу олон улсыг татаж байгаа том арга хэмжээ юм.

-Дотоодын аж ахуйн нэгжүүдээ хэр дэмжиж ажиллах вэ?

-Манай хувийн хэвшлийнхэн үүнд санаачлагатай ажиллаж байгаа. Өнгөрсөн оны сүүлчээр АСЕМ Экспо нэртэй дотоодын үйлдвэрлэгчдийн барааны үзэсгэлэнг гаргасан. Зочид буудлын өрөөнд тавигдах саван, шампуниас эхлээд бүх л зүйлийг Монголд үйлдвэрлэсэн барааг хэрэглэнэ. Дотоодын үйлдвэрлэлээ зочдод танилцуулах юм. Бизнесийн уулзалтын үеэр барааны үзэсгэлэнг гаргана.

-АСЕМ-ын дээд хэмжээний уулзалтын үеэр нийслэлчүүдийг хотоос гарч хөдөө явахыг хотын захиргаа уриалсан гэж байсан. Энэ үнэн үү?

-Энэ бол буруу ташаа мэдээлэл юм. Наадмын дараа манайхны амралт эхэлдэг онцлогтой. Тийм учраас  бид АСЕМ зохион байгуулах энэ өдрийг бид олон хүчин зүйлийг бодолцож сонгосон. Энэ цаг хугацаа бол иргэд амраад хөдөө гарсан, аймаг, сумын наадам эхэлсэн байдаг.  Бид хотоос гадуур урлаг соёлын арга хэмжээ зохион байгуулна. Бид энэ арга хэмжээний үеэр иргэдээ хөөсөн үйл ажиллагаа явуулахгүй.

Н.Энх