Дэлхий даяар жил бүрийн гуравдугаар сарын 2 дахь долоо хоногийн Пүрэв гаригт “Бөөр хамгаалах өдөр”-ийг тэмдэглэн өнгөрүүлсээр ирсэн. Анх 2006 онд Олон Улсын Бөөр Судлаачдын Нийгэмлэг бөөрний өвчний эсрэг авах арга хэмжээг сайжруулах зорилгоор уг өдрийг тэмдэглэж эхэлсэн байна. Улмаар дэлхийн бүх улс оронд уриалга хүргүүлсэн байна. Эл өдрийг одоогоор дэлхийн 200 гаруй оронд тэмдэглэдэг болоод байгаа аж. Харин манай улс 2009 оноос тэмдэглэж эхэлсэн. Өдгөө найм дахь жилдээ тэмдэглэн өнгөрүүлэх гэж байна.

ЭМШУИС-ийн Бөөр судлалын тэнхмийн эрхлэгч Т.Ариунаа “Бөөрний өвчлөл сүүлийн 10 жилийн байд­лаар хүн амын өвчлөлийн гуравдугаарт жагсах болсон. Энэ өвчин улс орон, хувь хүний эдийн засагт хор хөнөөлтэй өвчин юм. Ялангуяа эрт оношлуулаагүй тохиолдолд өвчин даамжирч архагшдаг. Нэгэнт архагшсан бол бүр мөсөн хэзээч эдгэрдэггүй. Тодорхой хугацааны дараа бөөрний архаг дутагдалд ордог. Ингэснээр бөөр биед гүйцэтгэдэг үндсэн үүргээ биелүүлж чадахгүйд хүрнэ. Хорт бодис биеэс гадагшлахгүй, цус төлжихгүй, даралт хэвийн биш болохоор хүний бие организмын солилцоо тэр чигээрээ зогсонги байдалд ордог. Мөн яс сийрэгжлтийг зохицуулдаг гол эрхтэн нь бөөр. Энэ мэтээр бөөр нь маш олон үүрэг гүйцэтгэдэг.  Ингээд бүх хэвийн байдал алдагдаж эцсийн шатандаа бөөр орлуулах эмчилгээ хийлгэхгүйгээр амьдрах боломжгүй болдог” хэмээсэн.

Дашрамд дуулгахад Дэлхийн бөөр хамгаалах өдрийг тохиолдуулан “Улаанбаатар-Мед” эмнэлэг бөөрний үзлэг, зөвлөгөөг өнөөдрөөс эхлэн энэ сарын 18-ны өдөр хүртэл үнэ төлбөргүй хийхээр болжээ.

Судлаачдын үзэж буйгаар дэлхийд бөөрний архаг өвчлөлтэй 500 гаруй сая хүн байдаг аж.

Г.Тэгшсүрэн