АНУ-ын Ерөнхийлөгчийн сонгуульд Бүгд найрамдах намаас намын сунгаанд өрсөлдөж буй Дональд Трамп өчигдөр Өмнөд Каролина мужид дэмжигчидтэйгээ уулзах үеэрээ халдлагад өртөх шахжээ. Трампийг үг хэлж байхад өнгөт арьстай эрэгтэй түүн рүү дайрч, хутгалахыг завдсан талаар “www.dailymail.co.uk” мэдээллээ.

Залуугийн өмдний халааснаас хутга олдсон байна. “Баригдсан залуу Трампийн хацрыг хүчтэй цохисон” хэмээн гэрчүүд мэдээлжээ.

Хамгаалагчид залууг нэр дэвшигчийг гэмтээхээс өмнө барьж, цагдаагийнханд хүлээлгэн өгсөн байна. Тэрбээр мэдүүлгийнхээ үеэр “Трамп энэ улсыг тэргүүлэх эрх байхгүй” гэж хэлжээ. Цагдаагийнхан “Нэр дэвшигчийг хутгалах санаа байсан уу” хэмээн асуухад залуу “Тийм” хэмээн хариулсан байна.

Трамп өнгөрөгч амралтын өдөр Мичиган мужид дэмжигчидтэйгээ уулзаж байхдаа мөн халдлагад өртөх шахсан юм. Түүний арьс өнгөний үзлийг эсэргүүцэн нэг этгээд цаасны хутга барин нэр дэвшигч рүү дайрсан билээ.

Б.Дэлгэрцэцэг