Нэг нь түрээсийн байрны төлөө алалцаж, нөгөө нь төсвийн мөнгөөр тансаг сууцанд тарвалзаж байна.

Хаврын синдром хараахан эхлээгүй бололтой, хотын гудамжинд эсэргүүцсэн, цугласан, жагссан үйл явдал бараг алга. Төрийн ордон ч эл хульхан, хаврын чуулган завсарласан учраас тэр.

Энэ өдрүүдэд хөл хөдөлгөөнтэй байгаа ганц газар нь ТОСК. Төрийн түрээсийн орон сууцны журам батлагдаж, энэ сарын 21-нээс эхлэн түрээслэгчдийн материалыг хүлээн авч эхэлсэн. Ахмад настнуудаас эхэлсэн бүртгэл ёстой алалцаан болж байна. Бүртгэл эхлэх сургаар хөгшчүүл ТОСК-ийн гадаа хонож, үүрийн жихүүнийг ч үл ажран очер дугаар авч, зогсов. Ингэж хаврын жихүүнд жиндэж, дугаарласан 1150 өндөр настны 600 орчим хүний материал нь шаардлага хангаж. Гэвч тэд бүгд Буянт-Ухаа II-т орохгүй. Сугалааны аз одтой 52 хөгшин л Буянт-Ухаад байр түрээслэх эрхтэй болно. Өөрөөр хэлбэл, 600 ахмад настны 52 нь л түрээсийн байранд орно гэсэн үг.

Өнгөрсөн өдрүүдэд залуу гэр бүлийг, өнөөдрөөс хувийн хэвшилд ажилладаг хүмүүсийн байр түрээслэх хүсэлтийг хүлээн авч байна. Мөн л очер дугаартай. Бүрдүүлсэн материал нь шаардлага хангасан бол нэг уртаар амьсгаа авч аз од байгаа эсэхээ хүлээж гэгэлзэх болно.

Ийн олныг нуршиж, зовлон тоочсоны учир нь тэнгэр, газрын ялгааг дурдах эхлэл болов. Нийгмийн дийлэнх хэсэг буюу газарт амьдрагсад мөнгөгүй, бор хоног, шар нарыг аргацааж байна. Тиймдээ ч түрээсийн байрны төлөө горьдлого тээж, хэдэн мянгаараа дугаарлаж зогсоно.

Харин нийгмийн багахан хэсэг болох тэнгэрийнхэн тэнгэртэй байна. Тэдний төлөөлөл нь Эрдэнэт үйлдвэрийнхэн. Монголын саалийн үнээ, төсвийн талаас илүү хувийг бүрдүүлдэг хэмээн дээш нь залж, хийж, бүтээж байгаа хүмүүс хэмээн хошуугаа цорвойлгосоор тэднийг давраасан бололтой. Эрдэнэт үйлдвэр гэх нэг баян вант улс Орхон аймгийн дотор бий болж,  мөнгийг баруун, солгойгүй цацдаг болов. Гэхдээ эрх мэдэлтэй цөөн хэдэн хүн Эрдэнэтийн хаялгыг илүү их хүртээд байгаа бололтой. Дарга нь 45 мянга хүртэлх еврогоор цалинжиж байна. Монгол Улсын хууль, эрхзүйд гадны валютаар цалинжина гэсэн ямар ч зүйл заалт байхгүйг би биш Сангийн сайд Б.Болор хэлсэн. Монголын нутаг дэвсгэрт хийгдэх бүх төрлийн төлбөр, тооцоо үндэсний мөнгөн тэмдэгтээр хийгдэх хууль бол бий.

Еврогийн цалингаас гадна Улаанбаатарын өндөр зэрэглэлийн хорооллуудад Эрдэнэтийнхэн байр авчээ. MCS-ийн “Будда Виста”, Номингийн “Таймскуэр”, “Ривер Гарден” хотхонд 150-180 м.кв талбайтай орон сууцыг 700-800 сая төгрөгөөр худалдан авсан баримт байна. Энэ бүхний төлбөр хариуцсан байгууллага нь Эрдэнэт үйлдвэр ХХК.

Энэ бүх баримтын араас Эрдэнэт үйлдвэр мэдэгдэл гаргасан. Тэгэхдээ еврогоор цалинждаг болоод тансаг зэрэглэлийн орон сууцыг хэдэн зуун саяар худалдан авсан баримтыг огтхон ч үгүйсгээгүй. Харин ч нууц, далд байх ёстой баримтыг ил гаргаж тавьсан нь буруу, хууль зөрчсөн үйлдэл хэмээн хэн нэгнийг буруутгасан. Эдийн засгийн энэ хүнд үед ажлаа сайн хийж байгаа удирдлага, багийн мууг үзэх гэсэн оролдлого гэсэн утгатай мэдэгдлийг хийж, өөрсдийгөө хаацайлж байх юм.

Эрдэнэт үйлдвэрийн 51 хувийг Монголын төр эзэмшдэг. Ард түмний өмч. Эрдэнэт үйлдвэрийг удирдаж, тэнд ажиллаж байгаа хүмүүсийн хувийн компани биш гэсэн үг. Тиймдээ ч Эрдэнэт үйлдвэрт шалгалт оруулах шаардлага үүссэнийг Сангийн сайд Б.Болор хэлнэ лээ. Монгол, Орос гэх хоёр улсын ард түмний өмчид тэнд ажиллаж буй орос, монгол товарищиуд хэтэрхий үрэлгэн хандаж байгаад үнэлэлт, дүгнэлт хийх цаг болжээ.

Төр өмчдөө эзэн болдог, хариуцлага ярьдаг гэдгийг Эрдэнэт үйлдвэрийнхэнд сануулах хэрэгтэй. Нэг нь түрээсийн байрны төлөө жиндэж, нөгөө нь тансаг байранд тарвалзах шударга бус байдал хүмүүсийг улам мохоож, доройтуулж байна.

Төсөв бүрдүүлдэг, улсын нэр тахалдаг гэж дээш нь тухлуулахын зэрэгцээ тодорхой хэмжээний даруулга хэрэгтэй болсныг илтгэх баримт ил болсоор байгааг холбогдох хүмүүс, байгууллага нь анхаарна биз ээ.

В.Хэрлэн