Нэр дэвшиж байгаа нэгний хувьд бол Баянгол дүүрэг зовлон болохгүй. Худалдаа, үйлчилгээ төвлөрсөн, гэр хороолол гээд байх зүйлгүй ер нь бусад дүүрэгтэй харьцуулбал зовлон багатай нь Баянгол.

Харин сонгогчдын талаас “үхлийн тойрог” болж магадгүй  нь. Учир нь энд тэндэхийн эрээвэр хураавар нөхөд Баянгол дүүргээс УИХ-ын сонгуульд нэр дэвшинэ хэмээн зарлаж, сонгогчдын сонголтыг сохор болоход хүргээд байна. Энэ, тэр гэж бодох ч шаардлагагүй, 10 тоолоод дугуйлахад ч буруудах зүйлгүй нөхдийн нэр дуулдаж байна.

Хамгийн түрүүнд дуучин Нара Баянгол дүүрэгт нэр дэвшинэ гэж зарлав. Хүмүүс бууз банш, бэлэг сэлтээ ярьж байхад Нара улс төрд орох бодлоо дэлгэж, сонирхолтой ярианы сэдвийг бий болгосон. Өнөөдөр ч ч хуучраагүй сэдвийн эзэн хэвээр байна.

Харин өнөөдөр дуучин Ноён Бондгор буюу Ц.Амарбаяр УИХ-ын сонгуульд нэр дэвших тухай мэдээлэл цацагдаж байна. Асуудлын гол нь тэр мөн л Баянгол дүүрэгт нэр дэвших гэнэ. Улс төр учраас урлагийн Баянголд ээлтэй гэж хадуурч боломгүй санагдана.

Хаврын улирал, сонгуулийн чимээ дөнгөж эхэлж байхад Баянголыг онилсон сонирхогчид ийн ээлж дараагаар бодлоо дэлгэж эхлэв. Хаврын синдром үргэлжлэх хугацаа дундаа ч ороогүй, чилийсэн хоёр сар хүлээж байгаа.Сонгууль бол бүр хол. Тэгэхээр ирэх өдрүүдэд Баянголыг онилсон саваагүйчүүд хэд хичнээнээрээ гарч ирэхийг таах боломжгүй.

Сонгуульд нэр дэвших нь хэн бүхний эрхийн асуудал. Сонгогдох эрхийг  бид эцэг хуулиараа баталжуулсан учраас нэр дэвших сонирхолтой нь яриад байх зүйлгүй. Товчхондоо Нара, Ноён Бондгор нарт нэрээ тат гэж хэлэх эрх бидэнд байхгүй. Хамгийн чухал нь сонголтод маань асуудал үүсч, Баянголынхон сохор сонголт хийхэд хүрнэ.

Баянголчуудын өнөөгийн сонголт нь УИХ-ын гишүүн С.Одонтуяа, С.Эрдэнэ нар. С.Одонтуяа жагсаалтад бичигдвэл С.Эрдэнэтэй, Х.Тэмүүжин хамтрах сураг бий. Харин МАН-аас экс Засаг дарга Л.Амгалан бууриа эргэхээр эртнээс төлөвлөж, элдэв хачиртай пиараа хийгээд эхэлсэн. Мөн Баянголоос НИТХ-ын төлөөлөгчөөр ажиллаж байсан “Оргил”-ын Ж.Ганбаатарын нэр дуулдаж буй.

Хэдэн жил Баянголоор эргэлдсэн хууччуултай ярих зүйл ховор. Угаас дөжирцөн.  Харин тэдэнтэй санал хуваах шинэковууд бол сонгогчдод халгаатай л байна. Баянголын 200 орчим мянган иргэний сонголт мэргэн байг гэж ерөөхөд ч түвэгтэй.

Одоогийн байдлаас харвал энэ сонгуулиар нэр дэвшигчдэд бус сонгогчдод халтай “үхлийн тойрог”-оор Баянголыг нэрлэбэл буруудахгүй л бололтой. 

В.Хэрлэн