МАХН-ын хэвлэл мэдээлэл хариуцсан нарийн бичгийн дарга Б.Тулга өнөөдөр “Үндэсний мэдээллийн төв”-д сэтгүүлчдийн асуултад хариуллаа. Тэрээр өнгөрсөн долоо хоногт болсон намынхаа Бага хурлын шийдвэрээр шинээр томилогдсон болон улиран сонгогдсон дэд дарга, нарийн бичгийн дарга нарынхаа талаар мэдээллээ. Мөн намын дарга Н.Энхбаярыг АТГ-аас Эрүүгийн хуулийн хоёр зүйл ангид хамааруулан шалгаж байгааг “Улс төрийн сонгууль ойртсон учраас ямар ч хамаагүй асуудал тохож, нам, улс төрийн ажлаас нь хөндийрүүлэх гэсэн оролдлого гэж үзэж байгаагаа хэлэв. Ингэж хэлэх үндэслэл нь Н.Энхбаярыг шалгаж буй хоёр зүйл заалт нь АТГ-ын эрхлэх асуудалд хамааралгүй, огт харъяалалгүй болохыг онцлов. Харин хэвлэлээр шуугиад буй МАХН-ын  дарга Н.Энхбаяр Сөүлийг зорьсон. Үдэж өгсөн нөхөд нь хоорондоо зодолдож, тодруулбал Б.Тулга, Их хурлын дэд дарга Л.Цогийн туслах Г.Улаанбаатарыг зодож танхайрсан гэдэг мэдээлэлд хариулахдаа  “Намын дарга  Солонгос улсыг зорин эмчлүүлэхээр явсан  нь үнэн. Энэ долоо хоногт  эх орондоо ирнэ. Г.Улаанбаатар бид хоёрын хувьд сүүлийн үед огт тааралдаагүй. Тааралдаагүй хүмүүс  хоорондоо зодолдсон гэдэг нь ташаа мэдээлэл” гэлээ.

Ч.ЗОТОЛ

Эх сурвалж: Polit.mn