УИХ-аас Гацууртын ордын төрийн эзэмшлийн хувийг 34 хувиар тогтоож, тусгай зөвшөөрөл эзэмшиж буй компанитай яриа хэлэлцээр хийх үүргийг Засгийн газарт өгсөн. Энэ дагуу Ерөнхий сайд Ч.Сайханбилэг захирамж гаргаж, Гацууртын ордын ашиглалт болон хөрөнгө оруулалтын гэрээ хийх ажлын хэсгийг байгуулсан юм. 

Тус ажлын хэсэг Гацууртын ордын тусгай зөвшөөрөл эзэмшигч “Сентерра гоулд Монголиа” ХХК-тай Орд ашиглах гэрээний хэлэлцээний эхний шатыг энэ оны 3 дугаар сарын 8-9-ний өдрүүдэд Канад Улсын Торонто хотод, 2 дахь шатны хэлэлцээг энэ сарын 22-25-ны өдрүүдэд Улаанбаатар хотноо хийжээ.

Гэрээний төсөлд Ноён уул орчмын бүс нутгийн соёлын өвийг хамгаалах, сурталчлах "Соёлын өвийг хамгаалах хөтөлбөр"-ийг боловсруулж, компанийн зардлаар санхүүжүүлэх, хэрэгжүүлэх, цэвдгийн судалгааг мэргэжлийн байгууллагаар хийлгэх, гол, ундны усанд үзүүлэх нөлөөллийг хянах төлөвлөгөө гаргаж хэрэгжүүлэх зэрэг заалтууд тусгажээ. Хөрөнгө оруулагчид ирэх долоо хоногт Монголд ирж, хэлэлцээг үргэлжлүүлэх аж.  

Канадын тал Орд ашиглах гэрээ, Хөрөнгө оруулалтын гэрээ болон Орон нутагтай хамтран ажиллах гэрээг нэгэн зэрэг байгуулах сонирхолтой байгаагаа илэрхийлсэн байна.

В.Бат