УИХ дахь МАН-ын бүлгийн хуралдаан өндөрлөлөө. Хуралдаанаар хэлэлцсэн асуудлын талаар  тус бүлгийн дарга С.Бямбацогт нар мэдээлэл хийлээ. МАН-ын бүлгийн гишүүд энэ долоо хоногт хэлэлцэх Ерөнхийлөгчийн санаачлан өргөн барьсан Төрийн шагналын тухай хуулийн төслийг дэмжихгүй гэдэгт санал нэгдсэн байна. Учир нь төр улсдаа олон жил зүтгэж гавьяа зүтгэлээ үнэлүүлсэн ахмадуудыг гаргуунд нь гаргаж ард иргэдээ хямраах хэрэггүй гэж үзсэн байна. Тус хуулийн төсөлд Хөдөлмөрийн баатар, Ардын жүжигчин цолыг хасч Улсын эрдэнэ гэдэг цол бий болгохоор тусгасан. Түүнчлэн Сүхбаатарын одон Хөдөлмөрийн гавьяаны улаан тугийн одонгийн оронд Эрдэнийн очир гэдэг цол бий болгохоор заасан. Энэ мэт өөрчлөлтийг хийх ямар ч шаардлагагүй гэж УИХ дахь МАН-ын бүлгийн гишүүд үзжээ.

УИХ-ын гишүүн Д.Лүндээжанцан “Мөн энэ долоо хоногт чуулганаар ҮХЦ-ийн  дүгнэлтийг хэлэлцэнэ. Энэхүү өөрчлөлтийн цаад утга нь аливаа асуудлыг ҮХЦ-ийн  их суудлын хуралдаанаар хэлэлцэж шийдвэрээ гаргасан ч тухайн асуудлыг нь дахин хуулинд өөрчлөлт оруулах боломжтой болно. Харин ингэж дахин өөрчилсөн асуудлыг цэц дахин хэлэлцэх ямар ч боломжгүй болно. Өөрөөр хэлбэл ҮХЦ-ийн  эцсийн шийдвэрийг гаргах эрх бүхий байгууллага байхаа болино гэж үзэж байгаа тул тус асуудлыг хэлэлцэхийг дэмжихгүй”  хэмээлээ.

Н.Энх