“Сүх далайтал үхэр амгалан” гэж айхтар үг бий. Тэгвэл хятадууд сүх далайгаад байхад хүртэл Монгол амгалан л байна шүү дээ.  Ерөөс Монгол Улс хятад иргэдээр дүүрчихсэн.

Тэд манай улсад юу дуртайгаа хийж, залуусыг нь зодож, охидыг нь мөнгөөр худалдаж авч, бизнесийн салбарт ч гэсэн нэгэнт “үүрээ зассан”. Хөдөө орон нутгууд хятадуудаар дүүрч, малыг нь малчинтай худалдаж авч байна. Ерөөс монгол нутаг тэднээр дүүрчихлээ. Тийм байхад төрийн удирдлагууд нүдэн балай, чихэн дүлий байсаар л байгаа. Сүүлдээ өнөөх хятадууд нь давраад, монголчуудыг зоддог, дарамталдаг, ажлаа хийлгэчихээд цалингаа өгдөггүй, бүр сүх, заазуур далайгаад байж байна.

Саяхан л гэхэд хятадууд монголчуудыг дарамталсан, зодсон хэрэг гарчээ. “UB TREED” хэмээх цагаач хятад иргэдийн байгуулсан компанид ажиллаж буй  100 гаруй монгол ажилчин дөрвөн сарынхаа цалинг аваагүй, байнгын дарамт зодууртай байдаг болсон байгаа юм. Аргаа барахдаа төр засагтаа биш   “Босоо хөх монгол” ТББ-д хандаж, тусламж гуйжээ.  Тус төрийн бус байгууллагын залуус тухайн компани дээр очиход нэг хятад нөхөр сүх барьчихсан даналзаж, “Чамтай юм ярихгүй. Би тэр ажилчидтайгаа ярина. Манайд мөнгө байгаа” гэх зэргээр даналзахыг бичлэгээс үзлээ. Бүр “Хойноос ирээд хот минийх. Хотонд ороод хонь минийх” гээч л болж. Жинхэнэ утгаараа “Бэрс” гарчихжээ, энэ хятадууд.

Уг нь монгол залуучууд бригадаараа “UB TREED” гэх компанид ажилласан юм билээ. Гэтэл сүүлдээ цалинг мөнгийг нь өгөхгүй, сүх, заазуураар зүсэж, дарамталж эхэлж. 100 гаруй хүний 200 гаруй сая төгрөгийн асуудал яригдаж байна. Бүр өнөөх хятадууд чинь  “Та нарыг шууд ална. Цагдаа шүүхээр заргалдаад ч нэмэргүй шүү” гэж дарамталсан байгаа юм. 

“Босоо хөх монгол” тэргүүн П.Шинжээравдан “Юун цалин мөнгийг нь өгөх манатай. Өчигдөр орой монгол ажилчид руу сүх барьж хөөж, ална тална гэж бөөн юм болсон байна. Өмнө нь бас нэг монгол залууг ална гэж хөөж тууж, өнөөх залуу нь гар хөлөө зүсүүлж байж арайхийж салсан гэж байгаа. Бас нэг ах хүүг толгой руу нь банз, паркетаар зоддог байсан гэж ярьж байсан. Их дээрэлхүү хужаа байна лээ. Өмнө нь бас засал чимэглэл хийдэг хоёр эмэгтэй ажилчныг зодож нүдсэн гэж байна.

Тэр барилгынх нь орлогч дарга гэж н.Баяртхүү гэж хятадын цагаач бол байнга зоддог. Нэг удаа зодохоор нь цагдаа дуудсан гэнэ. Гэтэл цагдаа нь ирээд хятадынх нь талд ороод “Та нар дуугүй мөрөөрөө бай. Тэгэхгүй бол та нар өөрсдөө ороогдоно” гэж дарамталсан байгаа юм. Ер нь хуулийнхныг атгачихсан гэж эрдээд, байнгын ийм үйлдэл гаргадаг газар юм байна. Монгол ажилчид маань бүр үгээ хэллээ. “Бид эх орондоо байж Эрээнд байгаагаас л дор нөхцөлд ажиллаж, амьдарч байна” гэж ярьцгааж байсан” хэмээн ярьжээ.

Бүр Монгол Улсын иргэнийг хамгаална гэж тангараг өргөсөн төрийн цагдаа нь хятадуудтай нийлээд, иргэдээ дарамталж байна. Ийм улс гэж байх уу. Энэ бол ердөө л наад захын жишээ шүү дээ. Нэгдүгээр эмнэлэгт хэвтэж буй ээжийгээ эргэхээр явж байсан залууг “Хаммер” жийп унасан хоёр хятад иргэн зодсон хэрэг гарч л байсан. Манай цагдаа нар очоод, баривчлах нь битгий хэл зодуулсан залууг өмөөрсөн хүмүүсийг “Юун сүртэй юм та нар” гэж загнасан тохиолдол ч бий. Хэвлэлээр өчнөөн шуугисан.

Энэ оны нэгдүгээр сард Хятадын Дэлгэр гэгч иргэн монгол эмэгтэйг зодсон хэргийн талаар хэвлэлүүд бас л шуугиж байсан. Байр авах гээд урьдчилгаа төлбөр эмэгтэйг шалтгаангүй зодож танхайрсан. Бүр эгчийгээ өмөөрөөд очсон дүүг нь ч бас зодсон байдаг. Бас л “Та нарыг алсан ч яадаг юм” гэж хэлсэн байгаа юм.

Энэ мэтээр жилд өч төчнөөн удаа гардаг хятад ажилчид монголчуудыг зоддог, дээрэлхдэг, “алсан ч яадаг юм” гэж сүрдүүлдэг хэрэг дуусахгүй. Гэтэл өнөөдөр монголчуудыг хэвтэрт ортол бүлэглэн зодсон хэргээр нэг ширхэг Хятад ял, шийтгэл авсан бил үү. Сайндаа л нутаг руу нь буцаадаг. Тэгээд манайхан буруутан болж үлддэг. Гэтэл нэг хятадыг манайхан зодчихвол бараг л ялын дээд хэмжээ оноох нь холгүй болно.

Саяхан Вьетнам ажилчид эхнэртэй нь явалдаад байхаар нь нөхөр нь найзуудтайгаа хамт очоод зодчихож. Гэтэл өнөөх Вьетнамууд нь хамаг хохирлоо барагдуулна гээд өч төчнөөн мөнгө өнөөх залуучуудаас аваад, нутаг буцсан байгаа юм. Харин Монголын шүүх элэг нэгтнүүддээ 1.6 жилийн ял оноочихоод л байж байна. Ганц хохирогч шүүх хуралд оролцоогүй байхад Сонгинохайрхан дүүргийн шүүхээс эхлээд 5.1 жилийн ял оноосон байдаг. Харин давж заалдаж явсаар арай гэж 1.6 жил болгочихоод байгаа юм. Монгол хүндээ Монголын шүүх, хуулийнхан ийм л хатуу хандаж байна. Гэтэл хятадууд манай иргэдийг дээрэлхэж, янз бүрээр аашилж байхад тоохгүй л байгаа шүү дээ. Монгол хүний үнэ цэнэ хаана байна аа. Төр засгийнхан Хятадууд бидэн рүү  сүх далайгаад байхад хүртэл амгалан суусаар  байх уу.