Өчигдөрхөн хэвлэлийн хурал хийж, МАН, МАХН сонгуульд эвсэн орохоор тохиролцсоноо дуулгаж байв. 51:25-ын харьцаатайгаар 76 суудлаа хувааж авахад болж, бүтэхгүй зүйл байхгүй хэмээн мэдэгдэж, нэг ширээний ард сууснаас хойш тийм ч олон цаг өнгөрөөгүй.

Гэтэл өнөөдөр өнөөх тохиролцоо “будаа” болсон сураг дуулдав. Сонгуульд эвсэх асуудлыг судлах МАН-ын ажлын хэсгийн ахлагч Ч.Хүрэлбаатар дөнгөж сая мэдээлэл хийж, “МАХН-ынхан хэлсэн амнаасаа буцаж байна” хэмээн мэдэгдэв. Мөн тэрбээр МАХН-ын дарга Н.Энхбаяр бусад нам, эвслүүдтэй өөр нэг тохиролцоо хийхээр гадуур явж, МАН-ынханд “олдохгүй” байгааг ч дуулгав. Тиймээс өнөөдөртөө багтааж хэлсэн ярьсандаа хүрэхгүй бол МАХН-ыг гуйхгүй гэдгээ хэлж байна.

Угшил нэгт намууд эвсэх болсон шалтгаан нь тун энгийн. Ирэх сонгуульд өнөөгийн эрх баригч АН-ыг түлхэн унагаж, парламентад олонх болох. Товчхондоо өнгөрсөн дөрвөн жилд босгонд боол байсан бол ирэх дөрвөн жилд хойморт хаан болох хүсэлтэй. Харин энэ хүсэлд нь МАХН-ын дарга Н.Энхбаярын хувийн сонирхол томоос том тээг болоод байгаа бололтой.

Н.Энхбаярын өнөөгийн ганц хүсэл нь өөрийгөө цагаатгуулах. Ямар ч гэм буруугүй гэдгээ хуулиар хүлээн зөвшөөрүүлж, УИХ-д нэр дэвших эрхээ олж авах нь түүний яг өнөөгийн туйлын ганц хүсэл нь. Энэ хүслээ гүйцэлдүүлэхэд нь МАН-ыг тусал гэсэн байр суурийг Н.Энхбаяр илэрхийлсэн сурагтай. Нэг үгээр хэлбэл МАН, МАХН эвссэн тохиолдолд Н.Энхбаярыг цагаатгахын төлөө зүтгэж, хамтран ажиллах ёстой гэсэн үг. Харин МАН-ынхан “үгүй” гэсэн хариулт өгснөөс хоёр намын эвсэх асуудал гацаанд оржээ. Гацаад зогсохгүй сонгуульд хамтрах асуудал бараг худлаа болох шинжтэй.

“Ах” намынхан Н.Энхбаярыг цагаатгах асуудалд нөлөөлж чадахгүйгээ мэдэж буй. Магадгүй бүр хүсэлгүй ч байж мэднэ. Тиймээс ч бүх зүйл нь “ok” шахуу болчихоод байсан эвсэл байгуулах асуудлаа цуцлахаар түрүүлж дуугарлаа. Сонгуульд оролцох намууд өнөөдөр ажлын цаг дуусахаас өмнө мөрийн хөтөлбөрөө СЕХ-нд хүргүүлэх ёстой. Улс төр болоод, улстөрчдийн ааш нэг суурин дээрээ хэд эргэж, хөрвөж болох ч ажлын цаг дуусахад тун бага хугацаа үлдээд байна. МАН, МАХН-ын эвсэл байгуулах санал, хамтран ажиллах гар барилт яриа болон үлдэж магадгүй нь. 

В.Хэрлэн