Сонгууль дөхөж байгаа энэ үед улс төрийн амьдрал халуухан өрнөж байна. Өчигдөр гэхэд МАН, МАХН, АН гэсэн УИХ-д суудалтай томоохон намууд багагүй бужигналаа. Ерөнхийдөө МАН, МАХН хоёр нэгдэх дээрээ тулж, тэр талаараа ч баттай мэдээлэл өгч байсан. Намаасаа хөөгдөж байсан гишүүнээс буцааж аваад л, бараг л ирэх сонгуулиар олонх болчихсон юм шиг баярлалдацгааж байлаа. Гэтэл оройхон тийшээ “цаг агаар”-ын байдал гэнэт хувирч, Н.Энхбаяр  хаврын тэнгэр шиг хуйсагнуур зан гаргах нь тэр. Улмаар хоёр нам нэгдэхгүй дээрээ тулж, дан дангаараа сонгуульд оролцохоор боллоо. Ерөнхийдөө МАН, МАХН хоёр нэгдэхээс АН-ынхан бэргэж байсан болохоор тэдний ч гэсэн нар гарав бололтой.

Өнөөдөр өглөө МАН-ын удирдлагууд хэвлэлийнхэнд мэдээлэл өгч, яагаад сонгуульд эвсч орохоо больсон талаараа тайлбарлав. Тэдний хэлснээр МАХН-ынхан арай л давруу загнаж, жагсаалтын эхний 15-д 6 хүнээ оруулахаар дайрсан юм байх. Мөн аль тойргийг авахаа түрүүлж шийднэ гэж даварсан гэнэ ээ. Тиймээс МАН-ынхан илт дургүйцэж, нэгдэхээс татгалзсан юм байх. Гэхдээ энэ шалтгаан нэг л үнэмшилгүй байгаа юм. Хоёр нам аль хэдийнэ тохироогоо хийчихсэн, эвсэх нь тодорхой байсан. Дээрээс нь Н.Энхбаяр МАН-тай нэгдэнэ гэж АН-ын “чичрүүлж”, оронд нь өөрийг нь сонгуульд нэр дэвших боломжоор хангах шийдвэрийг гаргуулах гэж чичирч байсан. Тэгээд ч жагсаалтад хэдэн хүн багтах, нэр дэвшигчдээ яаж зохицуулахаа ерөнхийд нь тохирсон байлаа.

Дээрээс нь МАН-тай МАХН нэгдвэл УИХ-ын сонгуульд олонх болох магадлал өндөр. Хэрвээ ялалт байгуулж чадвал Н.Энхбаяр нэлээд дээгүүр албан тушаалд очих нь тодорхой. Яаж ийж байгаад УИХ-д нэр дэвших эрхээ авчихвал мань хүнд УИХ-ын дарга, Ерөнхий сайдын суудлын аль нэг нь оногдох магадлал өндөр байсан. За нэр дэвшиж чаддаггүй юм аа гэхэд Ерөнхий сайдын суудалд очоод суучих боломжтой байсан хэмээн олон судлаач дүгнэж байгаа юм.

Ийм эгзэгтэй үед Н.Энхбаяр гэнэт шийдвэрээсээ буцаж,  зорилгоосоо няцсан нь нэг хүнээс шалтгаалсан гэж ярьж байна, гадуур. Түүнийг ингэтэл айлгаж, том албан тушаалд суух мөрөөдлөөсөө буцахд хүргэсэн хүн нь Ерөнхийлөгч Ц.Элбэгдорж бололтой юм. Өчигдөр прокуророос сэтгүүлчдэд мэдээлэл өгсөн. Уг нь шинэ байрныхаа талаар л мэдээлэл өгөхөөр сэтгүүлчдийг цуглуулсан. Тэр далимаараа Н.Энхбаярын хэргийн талаар цухуйлгаад авсан нь түүнд сануулга өгсөн хэрэг байсан байж болох юм. Мөн цаагуураа “Хэрвээ энэ мэт санаархлаа татаж авахгүй бол сонгуулиас өмнө бариад хорино шүү” гэж хэлсэн ч байж болох. Ер нь Н.Энхбаярыг барих гээд байна гэх мэдээлэл нэлээд явсан шүү дээ. Улмаар мань хүн Солонгос руу ум хумгүй зугтлаа ч гэж хэвлэлүүд мэдээлсэн. Харин гэнэт л нэг өдөр МАН-тай нэгдэх асуудал яриад, жин тан болгоод Солонгосоос ирсэн нь түүнийг хоёр том намыг айлгаж чадсаны илрэл гэж дүгнэхээс өөр аргагүй болгосон.

Яг үнэндээ бол Н.Энхбаяр айлгаж чадсан. АН-ынхныг ч хөдөлгөөнд оруулсан. МАН-ын нөхдүүдийг ч багагүй баярлуулсан. Заримыг нь шүү. Гэтэл гэнэт л өөрөө айсан нь дээрх хардлагыг төрүүлж байгаа юм. Нөгөө талаар МАН дотор Н.Энхбаярыг том албан тушаалд гарахаас айж байгаа хүн цөөнгүй бий. Хэрвээ Н.Энхбаяр УИХ-ын дарга юм уу, Ерөнхий сайд болчихвол МАН дотроос намнах “ан” цөөнгүй бий. Намнах ч болно. Тэгвэл намнуулж магадгүй хүмүүс нь түүнээс бэргэж, МАХН-тай нэгдэхийг эрс эсэргүүцсэн ч байж болох. Ямар ч байсан энэ мэт сонирхолтой үйл явдлын дараа АН л багахан хожоотой үлдэж байх шиг байна.  МАН, МАХН тусдаа сонгуульд орвол санал хуваах нь мэдээж. Тиймээс АН дундуур нь тоглолт хийх боломжтой болж байна.  Гэхдээ сонгуульд оролцох намууд СЕХ-нд бүртгүүлэх хүртэл юу ч болж магадгүй.