Хөдөлмөрийн үндэсний нам (ХҮН) 2016 оны УИХ-ын сонгуульд оролцохгүй гэдгээ албан ёсоор мэдэгдээд байна. Нам нь сонгуульд оролцохгүй хэрнээ тус намаас 20 хүн бие даан нэр дэвшинэ гэж Үндэсний мэдээллийн төвд өнөөдөр хэвлэлийн хурал хийсэн тус намын дэд дарга С.Боргил онцлов. ХҮН сүүлийн хэдэн сар тамга тэмдэг, даргын хэрүүлтэй байгаа. С.Боргилын хэлснээр тус нам хоёр тамгатай, ойрын хугацаанд тамгаа нэг болгож цэгцэлнэ гэнэ.

Улс төрийн хүрээнд хэд талцаж, тамгаа булаацалдаж, даргын суудлаа өгч, авалцсан ХҮН-ын хувьд УИХ-ын гишүүн С.Ганбаатар хэн юм бэ гэдэг асуулт хариултгүй үлдээд буй. Хэсэгхэн хугацаанд даргаар нь ажилласан тэрээр ХҮН-ыг сонгуульд оролцуулахгүй болтол нь шаварт хутгаад хаяв уу. Эсвэл ХҮН С.Ганбаатар гишүүнийг урьж, гишүүнээрээ элсүүлж, даргаараа сонгочихоод эцэст нь хөсөр гээсэн үү?

Улсын хэмжээнд нэр хүнд нь огцом өсөж, бүр тэргүүлж явсан УИХ-ын гишүүн С.Ганбаатар одоогоор Дархан-Уул аймагтаа буюу тойрогтоо ажиллаж байгаа гэх. ХҮН сонгуульд оролцохгүй учраас тэрээр намаас нэр дэвших боломжгүйд хүрчээ. Харин ХҮН-ынхны өгсөн мэдээллээр С.Ганбаатар тус намын гишүүнчлэлтэй хэвээр байгаа гэнэ. Гэвч сонгуульд хэрхэн, яаж оролцох нь тодорхой бус, таамаг төдий байна. Өөрөө ч энэ тухай ам нээгээгүй удаж буй. С.Ганбаатар ХҮН-ыг шаварт хутгасан уу, ХҮН С.Ганбаатарыг хөсөр гээв үү? Хэргийн эзэн нь хэн нь юм бол?

М.ЦЭЦЭГ

Эх сурвалж: www.polit.mn