Дүрвэгсдийг тээвэрлэж явсан завь Италийн эргийн ойролцоо осолдож, живсэн билээ. Уг завинд 562 дүрвэгч зорчиж явсан аж. Италийн эргийн хамгаалагчид шуурхай ажилласны үр дүнд 400 шахам хүнийг аварсан юм. Аврагчид өчигдөр далайгаас 33 дүрвэгчийн цогцсыг гарган авсан талаар “www.dailymail.co.uk” мэдээллээ.

Ойролцоогоор 100 орчим дүрвэгч сураггүй алга болсон юм. Италийн эргийн харуулын усан онгоц өчигдөр 65 км газар хайгуул хийсэн ч дүрвэгсэд болон цогцос олоогүй гэнэ.

“Аврах ажиллагаа энэ амралтын өдөр хүртэл үргэлжилнэ” хэмээн Италийн Ерөнхий сайд мэдэгджээ. Тэрбээр “Амиа алдагсдын тоо 100 давж магадгүй байна. Үнэхээр харамсалтай үйл явдал боллоо. Харамсч байна” гэж хэлжээ.

“Уг завинд Ливи, Хойд Африк болон Пакистаны иргэд зорчиж явсан” хэмээн Олон улсын цагаачлалын байгууллага (IOM)”-аас мэдээлэв.

Б.Дэлгэрцэцэг