Энэ долоо хоног шинэ төр, засаг эмхлэгдэн байгуулагдана. Ерөнхийлөгч анхдугаар чуулганыг маргааш хуралдуулах захирамжаа гаргасан.

Парламентад олон суудал авсан намын дарга М.Энхболд ямар албан тушаалд дэвшихээс дараагийн томилгоонууд үргэлжлэх бололтой. Шинэ парламентыг МАН-ын дарга М.Энхболд удирдах сураг байна. Учир нь ирэх жил Ерөнхийлөгчийн сонгууль болно. Тиймээс МАН-ын дарга М.Энхболд Ерөнхийлөгчийн сонгуульд өрсөлдөх үүднээс  энэ удаад УИХ-ын даргын албан тушаалд очиж магадгүй аж. Хэрвээ тэрбээр ирэх сонгуульд Ерөнхийлөгчийн сонгуульд эс өрсөлдвөл Засгийн газраа тэргүүлээд явах бололтой. Энэ тохиолдолд УИХ-ын даргаар УИХ-ын экс дарга Ц.Нямдорж томилогдох сурагтай.

МАН Засгийн газрыг цомхон бүтэцтэй, чадварлаг мэргэжлийн багаар удирдуулна гэж байсан. Тиймээс ч одоогийн 16 яамдын 18 сайдын тоог цөөлөх  байх.  Ерөнхий сайд, Шадар сайдаас гадна Сангийн яам, ГХЯ, БОНХАЖЯ, Хуульзүйн яамыг гэсэн үндсэн чиг үүргийн яамдыг хэвээр үлдээж, зарим яамыг нэгтгэх асуудал яригдаж байна.

Ер нь яамдын бүтэц, сайдуудын томилгооны асуудалд цаг алдаж, удаад байхгүй биз, МАН. Нэгэнтээ парламентад олонхийн суудал авсан тус намд бусадтай хамтарч, санал хүргүүлэх асуудал байхгүй. Өнөөдөр хэнийг аль яамны сайдаар томилох шийдвэрээ МАН-ын дарга М.Энхболд нэгэнтээ гаргачихсан байгаа. Тэрбээр саналаа  МАН-ын Удирдах зөвлөлөөр хэлэлцүүлэн дэмжихэд асуудал цааш гацахгүй. Өмнө нь нийслэл хотыг ч, Засгийн газрыг ч удирдаж явсан түүхий хувьд дурсамж төдийгүй туршлага хуримтлагдсан байгаа.

Олон нийтийн зүгээс төр, засгийг тэргүүнээр хэнийг томилох, аль яамыг хэн удирдах бол гэсэн хүлээлт үүссэн. Цаашлаад МАН сонгуулиар дэвшүүлсэн мөрийн хөтөлбөрөө хэрэгжүүлж, эдийн засгийг сэргээх  арга хэмжээгээ шуурхай явуулах нь нийгмийн захиалга.

МАН өөрсдийгөө боловсон хүчний нөөцтэй гэж тодорхойлдог. Үүнийг энэ удаагийн УИХ-ын сонгуулиар нэр дэвшигчдээрээ баталсан гэж болно. МАН-аас шинэ парламентад анх удаа гишүүнээр сонгогдсон  38 эрхэм байгаа. Тэднийг хамгийн залуу нь 29 настай залуу боловсон хүчин. Тиймээс сайдын болоод яам, агентлагийн дарга нарын томилгоо явуулахад АН шиг боловсон хүчний хомсдол үүсэхгүй юм билээ.

Энэ удаа хоёр сонгууль зэрэг явагдсан. НИТХ-ын хуралд мөн л МАН ялалт байгуулж олонх болоод байгаа. НИТХ бол мени парламент. Ирэх дөрвөн жил нийслэлийн нийгэм, эдийн засаг, хөгжлийг бодлого тодорхойлох батлах мени парламентын даргаар нийслэлийн МАН-ын хорооны дарга Ц.Сандуйг томилохоор болжээ. Тэрбээр ИТХ-ын сонгуулиар нийслэлийн МАН-ын сонгуулийн штабыг ахлан ажилласан юм.

Харин нийслэлийн Засаг дарга бөгөөд Улаанбаатар хотын захирагчаар УИХ-ын экс гишүүн Су.Батболд томилохоор саналболгож байгаа аж. УИХ-ын экс гишүүн Су.Батболд 2000 оны УИХ-ын нөхөн сонгуулиас хойш парламентад тасралгүй 4 удаа сонгогдож байсан. Тэрбээр энэ удаад сонгуульд нэр дэвшин өрсөлдөөгүй. МАН-ын Сонгуулийн штабыг ахлан ажиллаж, намаа сонгуульд ялахад нөлөө бүхий үүрэг гүйцэтгэсэн. УИХ-ын гишүүнээ байхдаа Засгийн газрын Хэрэг эрхлэх газрын даргаар ажиллаж байсан. Тиймээс  түүнийг  туршлагатай, бэлтгэгдсэн, нэр цэвэр боловсон хүчин хэмээн намынхан нь төдийгүй олон нийт ам сайтай байна лээ.

Ийнхүү энэ долоо хоногт шинэ төр, засаг эмхлэгдэж байгуулагдана.  Улсын баяр наадмаа бид шинэ парламентын дарга,  Засгийн газар тэргүүн,  шинэ  УИХ-ын гишүүн, сайдтайгаар угтах нь ээ.

Н.Энхлэн