“Олимпийн хөгжлийг дэмжих сан”-ийн удирдлагууд “Рио 2016” олимпийн наадамд оролцох Монголын шигшээ багийн тамирчдын өмсөх “Team Mongolia” брэнд хувцсыг олон нийтэд танилцууллаа. Тус хэвлэлийн хуралд  “Олимпийн хөгжлийг дэмжих сан”-ийн тэргүүн, Монгол Улсын Гавьяат дасгалжуулагч Ч.Наранбаатар, “Евро Ази” компанийн захирал Д.Пүрэв-Очир нарын хүмүүс оролцов.

“Теам Mongolia” брэнд хувцасанд Монгол Улсын логог шар өнгөөр илэрхийлжээ. Манай Улсаас гадна БНХАУ-ын тамирчид өөрийн улсын төрийн далбаатай адилтган шар өнгийн хувцсаар “Рио 2016”-д гоёх юм. Үүнээс үүдэн Хятадыг дууриаж, логогоо шар өнгөөр солилоо гэх шүүмж гараад байв. Үүнд ““Евро Ази” компанийн захирал Д.Пүрэв-Очир тайлбар өглөө.

Тэрбээр “Алтан медалийг илэрхийлэх өнгө учраас шар өнгийг бид сонгосон. Ер нь бол спортын амжилт гэдэг хувь хүний зүтгэл, тухайн улс орны дэмжлэг, шинжлэх ухааны байгууллагын судалгаа зөвлөмжийн үндсэн дээр бий болдог. Бид ихэд, дээдсээс бидэнд уламжилж ирсэн үнэт логоныхоо төрхийг хадгалах нь чухал юм. Тэрнээс өнгө чухал биш. Хэрэв бизнесийн чиглэлээр бол ёслолын хуцас заавал алтан шаргал өнгөөр биш хувцасны өнгөөр жигдэрч цаашид үргэлжлэх ёстой. Үүний бизнес төлөвлөгөө гарсан байгаа. Харин өнөөдөр бид алтан медалийг арваас дээш авъя гэсэн санааг тусгаж логонд шар өнгийг сонгосон юм шүү гэдгийг хэлмээр байна” хэмээв.  

Логоноос гадна манай орны тамирчдын олимпийн ёслолд өмсөх хувцас мөн шар өнгөтэй. Энэ нь мөн л шүүмж дагуулаад байгаа юм.

Энэ талаар “Олимпийн хөгжлийг дэмжих сан”-ийн тэргүүн,  Монгол Улсын Гавьяат дасгалжуулагч Ч.Наранбаатар “Бээжингийн олимпод Хятадын эмэгтэй тамирчид шар хувцсаар гоёсон. Бид үүнийг дуурайсан юм биш. Зөвхөн алтан медалийг бэлгэдэж энэ өнгийг сонгосон. Тэгэхээр аль улс ямар хувцастай байх нь хамаагүй. Бид өөрсдийн мөрөөдөл, хүслээр явна. Цаашид ч энэ зорилгынхоо дагуу өнгөө өөрсдөө сонгоно” хэмээн ярилаа.

Олимпийн ёслолд өмсөх тус хувцсыг “Шилмэл загвар” ХХК зохион бүтээсэн. Харин бэлтгэлийн иж бүрэн хувцсыг “Аsics” брэндээс худалдан авчээ.

Г.Тэгшсүрэн