“Рио 2016” олимпийн наадмын мөнгөн медальт, Монгол Улсын Гавьяат тамирчин Д.Сумъяа өнөө өглөө эх орондоо ирлээ. Түүнийг Хил хамгаалах ерөнхий газрын удирдлагууд болон гэр бүл, найз нөхөд нь угтан авч баяр хүргэв. Түүнтэй баярын сэтгэгдлийг нь хуваалцлаа.

-Тив дэлхийд эх орныхоо нэрийг дуурсгасан танд баяр хүргэе.

-Баярлалаа. Юуны өмнө эх орондоо ирэх сайхан байна. Тэгээд бас 28 жилийн дараа жүдогийн  анхны эмэгтэй медальтан болсондоо баярлаж байна даа.

-Тэмцээний үед маш тайван байх шиг харагдсан. Тэр тусмаа мөнгөн медалийн төлөөх барилдаанд?

-Хагас шигшээд үлдэж Японы Каори Мацумото учраа таарсан. Өрсөлдөгчөө сууж үүрэх мэхээр цэвэр ялж, алтан медалийн төлөө өрсөлдсөн. Каори бид хоёрын  ялалт ялагдлын харьцаа маш ойрхон байсан. Багш нартайгаа маш сайн төлөвлөгөө боловсруулсны эцэст түүнийг ялсан гэж бодож байна.

-Тэр барилдаан шилдгээр нэрлэгдсэн байна лээ?

- Маш сайхан барилдаан болсон гэж бодож байна/инээв.сур/.

-Таныг дэмжсэн олонд хандаж үг хэлэх үү?

-Баярлах хүн олон байна. Юуны өмнө багш нартаа баярлалаа. Жүдо бөхийн холбоо болон удирдлага, МҮОХ, спорт бэлтгэлийн төв, ХХЕГ-ын нийт хамт олондоо баярлалаа. Гэр бүл, анд найз бүгдэнд нь маш их баярлалаа. Хамгийн чухал нь  Монголынхоо нийт ард түмэнд дээлийн зах мушгиж, үргэлж хамт байж, дэмжсэнд баярлалаа гэж хэлмээр байна.

Ц.Дэлгэрмаа: Охин маань их гүргэр хүүхэд байсан

МУГТ Д.Сумъяаг угтан авахаар түүний аав  М.Доржсүрэн, ээж Ц.Дэлгэрмаа нар ирсэн байлаа. Тэд ийнхүү сэтгэгдлээ хуваалцлаа.

М.Доржсүрэн: “Манай охин гуравдугаар ангид байхдаа аав ээждээ бөхийн спортоор хичээллэмээр байна гэж хэлээд анх энэ спортод хөл тавьж байсан даа. Олимпийн наадмын барилдаан болгоныг нь маш их догдолж үзсэн. Шигшээ наймд үлдэх эрхийн төлөө дэлхийн аваргын дөрвөн мөнгө, нэг хүрэл медальтай Португалийн Телма Монтейротой учраа таарсан. Тэр барилдаан их хүнд байх шиг санагдсан. Мөн Рафаела Силва их мундаг өрсөлдөгч байх шиг байна билээ. Манай тэнд хүчтэй аадар бороо ороод зурагт гарахаа больчихсон. Тэгээд бид нар маргааш нь давталтыг нь үзсэн дээ.

Ц.Дэлгэрмаа: Манай Сумъяа багадаа их эршүүд хүүхэд байлаа. Ер нь аливаад их тууштай, гүргэр охин байсан шүү. Японы Каори Мацумототой барилдаад ялахад нь зурагт үзээд сууж байсан баярлаад л босоод ирсэн. Тэгээд л нулимс асгарчихсан. Маш их догдолсон. Үнэхээр сайхан юм билээ. Охиноор минь Монголын ард түмэн бахархаж байгааг харах үнэхээр сайхан юм. Охиныг минь дэмждэг байгууллага хамт олон, жүдогийн холбоо, ард түмэн гээд бүх хүмүүст баярлалаа.

Ийнхүү зуны XXXI олимпийн наадмын жүдогийн эмэгтэйчүүдийн 57 кг-ийн жинд мөнгөн медаль хүртэж, тив дэлхийд эх орныхоо нэрийг дуурсгасан Жүдо бөхийн шигшээ бөхийн тамирчин, ХХЕГ-ын “Хилчин” спорт хорооны тамирчин,  Д.Сумъяа эх орондоо ирлээ.

Г.Тэгшсүрэн