Я.Ариунболд: Шүүгч цагаатгах тогтоол уншихад өөрийн эрхгүй уйлсан

Сонгинохайрхан дүүргийн иргэн Я.Ариунболд Эрүүгийн хэрэгт холбогдож, шүүхээр хэрэг маргаанаа шийдүүлжээ. Анхан болон давж заалдах шатны шүүхээс түүнд холбогдох хэргийг хэрэгсэхгүй болгож, цагаатгасан байна. Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүх, Эрүүгийн хэргийн давж заалдах шатны шүүхээр үйлчлүүлсэн Я.Ариунболд ингэж ярьсан юм.

-Нууц биш бол та ямар хэрэгт холбогдсоноо яриач?

-Би эдийн засагч мэргэжилтэй. Одоогоос жилийн өмнө иргэн Б-ээс орон сууц худалдаж авахаар тохиролцоод урьдчилгаа мөнгө төлж худалдах, худалдан авах гэрээ байгуулсан юм. Үлдсэн мөнгийг нь тав хоногийн дотор төлнө гэж тохирсон ч өгч чадаагүй. Тиймээс цагдаагийн байгууллага намайг Б-г залилан мэхэлж, 80 сая төгрөгийн хохирол учруулсан хэрэгт холбогдуулан шалгасан. Улмаар прокуророос Эрүүгийн хуулийн 148 дугаар зүйлийн 148.4 дэх хэсэгт зааснаар яллах дүгнэлт үйлдэн шүүхэд шилжүүлсэн.

-Таны үйлдсэн гэх хэргийг шүүх яаж шийдвэрлэсэн бэ?

-Анхан шатны шүүх хуралдаан 2016 оны тавдугаар сарын 31-ний өдөр болсон. Шүүх миний үйлдсэн гэх хэргийг бусдыг хуурч мэхлэх, итгэл эвдэх аргаар залилан мэхлэх гэмт хэргийн бүрэлдэхүүнгүй, харин гэрээгээр хүлээсэн үүргээ биелүүлээгүйгээс үүссэн иргэд хоорондын маргаан гэж үзсэн. Тиймээс хэргийг маань хэрэгсэхгүй болгож, намайг цагаатгасан.

-Шүүх хуралдаанд сууж байхад ял авчих вий гэсэн айдас байв уу?

-Ингээд л шоронгийн хаалга татлаа даа гэж маш их айж байсан. Гэрийнхэн маань нүдэнд харагдаад хэцүү юм билээ. Шүүх хуралдаан завсарлаад хэсэг хугацааны дараа шүүгчид танхимд орж ирээд цагаатгах тогтоол уншихад өөрийн эрхгүй нүднээс нулимс гарсан. Би шүүгчийг улсын яллагчийн талд байх болов уу гэж төсөөлж шүүх хуралдаанд орсон. Гэтэл шүүгч аль нэг талд үйлчилдэггүй, хуулиа ягштал баримталдаг юм байна лээ. Шүүгчид хараат бус шийдвэр гаргадаг гэдгийг ойлгосон. Шударга шүүхээр шүүлгэсэндээ маш их баярлаж, шүүгчдээрээ бахархах сэтгэгдэл төрсөн.

-Давж заалдах шатны шүүхэд очсон уу?

-Прокурор эсэргүүцэл бичиж, хохирогч гомдол гаргасан. Тиймээс Эрүүгийн хэргийн давж заалдах шатны шүүх хэргийг хянаад анхан шатны шүүхийн шийдвэрийг хэвээр үлдээсэн л дээ. Улсын яллагч эсэргүүцэл бичсэн шалтгаанаа ч тайлбарлаж чадахгүй байхад харамсах сэтгэгдэл төрж байсан. Би энэ хэрэгт холбогдож жил шахам ажил хийх боломжгүй явсан. Цагдаагийн байгууллагын үүдэнд өдөр бүр өнжиж байхаар ажил хийгээд өрөө төлсөн бол гэж харамсдаг. Гэвч шударга шүүхийн хүчинд ялгүй үлдсэндээ баяртай байна. Би өмнө нь шүүхээр үйлчлүүлж байгаагүй. Оюутан байхад уншиж, судалж байсантай харьцуулахад өнөөдрийн шүүх шинэчлэгдэж, хүнд сурталгүй, ямар нэг айдасгүй газар санагдсан.

Ж.Энхбаяр

Эх сурвалж: www.judcouncil.mn