Олон улсын “International SOS” байгууллага дэлхийн хамгийн тайван болон хамгийн аюултай улсуудыг нэрлэсэн байна.  Тус байгууллага тайван болон тайван бус улсуудыг нэрлэхдээ өнгөөр илэрхийлжээ.

Дэлхийн хамгийн аюулгүй улсаар Норвеги, Фянланд, Швед улс багтсан бол  хамгийн аюултай улсаар Мексик, Ирак, Ливи, Египет, Афганистан, Сири, Йемен, Тайланд улсыг нэрлэжээ.

Ногоон

Газрын зураг дээр ногоон өнгөөр нэрлэгдсэн улсуудад хүчирхийлэл, жагсаал болон мөргөлдөөн гардаггүй. Иргэд нь тайван. Аюулгүй байдал болон түргэн тусламжийн асуудлыг эрх баригчид бүрэн шийдвэрлэсэн аж.

Шар

Гэмт хэрэг гаралтын тоо бага. Охид болон эмэгтэйчүүдийн эрхийг дээдэлдэг. Олон нийтийг хамарсан үймэн, цуглаан гарах нь ховор. Аж үйлдвэр болон тээврийн асуудалтай холбоотой маргаан гардаггүй.

Улбар шар

Үе үе жагсаал цуглаан гарч, гэмт хэргийн тоо нэмэгддэг. Арьс өнгө, шашин шүтлэгтэй холбоотой гэмт хэргүүд бүртгэгддэг. Хүчирхийлэл газар авах магадлалтай. Аж үйлдвэр болон тээврийн асуудалтай холбоотой хэргүүд гардаг.

Улаан

Эсэргүүцлийн жагсаал болон хүчирхийлэл байнга гардаг. Энэ бүхэн нь аюулгүй байдалдаа саад учруулдаг. Ажилгүйдэл газар авсан. Иргэдийн сэтгэл зүй тогтворгүй.  Шашин болон арьс өнгөөр ялгаварлан гадуурхах үзэл их.

Хар улаан

Засгийн газрын хяналт сул, хууль тогтоомж биелүүлэхгүй бүс нутаг их. Зэвсэгт бүлэглэлүүд байнга хүчирхийлэл үйлдэж, энгийн иргэдийг хохироох гэх мэт. Эрүүл мэнд болон тээврийн салбар зогсонги байдалтай.

Б.Дэлгэрцэцэг