УИХ-ын чуулганы нэгдсэн хуралдаанаар Эрүүгийн хэрэг хянан шийдвэрлэх хуулийн төслийн анхны хэлэлцүүлгийг хийж байна. Хэлэлцэж байгаа асуудалтай холбогдуулан зарчмын зөрүүтэй саналаар санал хураалт явуулж байгаа юм. Хянан шийдвэрлэх асуудалтай холбогдуулан гишүүн Ц.Нямдорж:

-Хүн эцсийн удаа Монголын шүүхэд хандах боломжийг хаасан. Үүнийг та нар яаж ойлгоод байна. Хяналтын шатны шүүх гэхээр өмнө нь Улсын дээд шүүхэд улсын прокурор, ерөнхий шүүгч нар хэлэлцдэг байсан. Одоо болиулсан. Уг зүй нь анхан шат, давж заалдах, хяналтын шатны шүүх гэж байсан. Хаана ч ийм зүйл байдаг. Үүн дээр тайлбар авъя. Үндсэн хууль баталсан түүхээ мартаад байгаа юм. Тэр үед Эрүү, иргэний шүүхийг салгах ойлголт байгаагүй. Монголд ч ийм ойлголт байгаагүй. Та бүхэн холиод байна. Үндсэн хуульд өөрчлөлт ороогүй.

Ажлын хэсгийн ахлагч Х.Нямбаатар:

-Нийт шүүгчдийн хурлыг сэргээж байгаа. Ингэхдээ томилгоо, нормативтай холбоотой асуудлыг хэлэлцэнэ. Хянан шийдвэрлэх шүүхэд гомдол гаргаж болно. Нийт шүүгчдийн хурлын асуудал одоо ч хэвээр байгаа.

УИХ-ын гишүүн Ц.Нямдорж:

-Өсвөр насны  гэж юу гэсэн нэр вэ. Хуучин насанд хүрсэн, хүрээгүй гэж л насаар нь ангилдаг байсан. Мөн сонин сонин нэр томъёолол оруулж ирэх юм. Хавтас хэргийг хариуцна гэж ямар юм байдаг юм. Хоёрдугаар хэлэлцүүлгийн үед бичилтээ янзалмаар байна. Монгол хэлээр хэзээ бичиж сурах вэ та нар, модон юм бичээд байх юм.

Ажлын хэсгийн ахлагч Х.Нямбаатар:

-Эрүүгийн хуулиар ийм нэр томъёо оруулж ирсэн. 14 наснаас эрүүгийн хариуцлага хүлээлгэхээр болсон.

УИХ-ын гишүүн Ц.Нямдорж:

-Мэтгэлцэх зарчмаар прокурор, өмгөөлөгч хоёр ордог. Гэтэл прокурорын саналаар  өмгөөлөгчийг шүүх хуралд оролцуулахгүй гэсэн зүйл байхгүй. Мэтгэлцэх зарчим байхгүй болж, прокурор дураараа шийдвэр гарах нь. Энэ саналаа татаж ав.

Ажлын хэсгийн ахлагч Х.Нямбаатар:

-Энэ хуулийн 5.7-д зааснаар хамтрах ажиллах этгээдтэй холбоотой зохицуулалт. Прокурор хамтран ажиллах этгээдийн асуудлаар өмгөөлчид мэдэгдэхгүй байж болох талаар заасан. 

УИХ-ын гишүүн Ц.Нямдорж:

-Хамтран ажилласан этгээд гээд яриад байгаа юм. Гүйцэтгэх ажлыг байцаан шийтгэх хуулинд түлхүү оруулах юм яриад  байна. Гүйцэтгэх ажлыг байцаан шийтгэх, шүүхийн шатанд түлхүү оруулвал алдаа гарах магадлал өндөр болдог. Томъёолол нь хүртэл буруу. Хамтран ажиллагч гэж ямар юм байсан юм. Ямар хамтран амьдрагч биш. 

Ийнхүү уг хуулийн төсөлтэй холбогдуулан зарчмын зөрүүтэй саналын санал хураалт үргэлжилж байна. 

Н.Энх