УИХ-ын чуулганы нэгдсэн хуралдаанаар Ерөнхийлөгчийн сонгуулийн өмнөх эдийн засаг, төсөв, санхүүгийн тайланг сонслоо

Дараагаар нь гишүүд асуулт тавьж, саналаа хэлэв.

УИХ-ын гишүүн Ц.Нямдорж:

-Ер нь Ерөнхийлөгчийн үйл ажиллагаатай холбогдуулж, улс төрийн дүгнэлт хийх хэрэгтэй. Том өнцгөөр нь харвал ажлаа хийж байсан учраас ажил харагдана. Ардын үг гээд “онцсайн” дүн тавиулаад яваад байна. Ц.Элбэгдорж гэдэг хүний хувьд Монголын улс төрийн хоёр нам голомтод орсон. Хоёр удаа Ерөнхийлөгчийн сонгуулийг нь ахалж, Ерөнхийлөгч болгосон хүнийг унагаад АН-ыг ком-д оруулсан, одоо бүүр хэвтэрт орчихсон. Энэ сонгуульд  дахиад хаялга нь гарна. Би Ц.Элбэгдоржид “Чи энэ будлианыхаа учрыг хэзээ олох вэ, чиний энэ үйлдэл хүүхдэд чинь бууна шүү” гэсэн. Ингээд Монголын хоёр том намыг самарчихсан.

ҮАБЗ дээр ашигт малтмалтын хуулиар оролдож, гадаадын хөрөнгө оруулагчдыг үргээсэн. Энэ завсар АН яаж хууль бус зүйл хийхгүй байх вэ. Ингээд эдийн засгийг тэглэсэн. Одоо энэ бүхнээс чинь гарах гэж тамаа эдэлж байна. Та нар ангал руу нисэх зүйл дээр аваад тавьчихсан шүү, АН-ынхан.

Шүүх засаглалыг жинхэнэ захиалгат, улс төрийн, дампуу болгосон. Энэ хүний томилсон шүүгч, прокурор юу хийж байна. Гэгээн цагаан өдөр шүүх хурал хийж, хэлмэгдүүлдэг. Би юм хаашаа явж байгааг ерөнхийдөө гадарлана. 

УИХ-ын гишүүн Ж.Батзандан:

Гэмт хэрэг залилан хийсэн хүнийг Элчин сайдаар явуулаад байх юм. Швейцарь, Англид залилан хийсэн хүнийг Элчин сайдаар томилсон. Одоо Сан Францискод залилан хийсэн хүнийг консулаар томилох гэж байна. Гадаад харилцааны салбарт завхрал дээд цэгтээ хүрлээ. Батлан хамгаалах яам Ц.Элбэгдоржийн гараар явж байна. Энэ хүн Монголоор тоглож дууслаа.

Элбэгдоржтой дөрвөн жил хуйвалдлаа, МАН. Одоо болихгүй юм уу.

УИХ-ын гишүүн Д.Эрдэнэбат:

-Энэ удаагийн тайланд улстөржөөгүй нэг дүгнэлт оржээ. Эдийн засгийн хүндэрсэн шалтгааныг Сангийн яам анх удаагаа зөв дурдсан байна. Мал сүргийн тоо сүүлийн жилүүдэд асар их нэмэгдсэн. Үүнтэй холбогдсон сөрөг үр дагавар хуримтлагдаж байгаа. 2018 оны төсвийн үндсэн чиглэлд 97-хон тэрбум төгрөгийг хөдөө аж ахуйд төсөвлөсөн. Энэ талаар тайлбар хийнэ үү. Оюутолгойн 34 хувийн зээлийн хүүг 8 хувиар авчээ. Үүнд Монгол Улс хэдийг төлж байна вэ? гэсэн асуултад  “Мал аж ахуй салбарт жилдээ 7-8 сая толгойгоор малын тоо нэмэгдээд явж байгаа. Гэхдээ экспортод гаргах тал дээр хангалтгүй. Эдийн засгийн эргэлтэд оруулах, эдийн засгийг төрөлжүүлэхэд мал аж ахуйн салбар чухал үүрэгтэй. Малыг эрүүлжүүлэх асуудал чухал. Тийм учраас малыг вакцинжуулах асуудал тусгагдсан. Мах, сүүний анхдугаар аяныг мөн тусгасан. Гадаад худалдааны тэнцэл ашигтай гарч байгаа. Эрчим хүчний хувьд Оюутолгойд импортын цахилгаан хэрэглэдэг” гэдэг хариултыг холбогдох мэргэжлийн хүн хариулсан юм.

УИХ-ын гишүүн Б.Баатарбилэг:

-Бидний хамгийн их алдсан зүйл бол хүний эрх, эрх чөлөө байдаг. Энэ нь олон улсын судалгаанаас харагддаг. Энэ бол үнэхээр ухралт болсон, төсөв мөнгөөр хэмжигдэж болдоггүй. Ерөнхийлөгч өөрийнхөө төсвийг дөрвөн жил танасан шүү гээд байсан. Өөрсдөө төсвийн зардлаа гозойтол өсгөчихөөд буулгасан дүр эсгэдэг байдал газар авсан.

Чуулганы хуралдаан үргэлжилж байна. 

Н.Энх