Нийслэлийн Засаг даргын санаачлагаар Сөүлийн гудамжийг автомашингүй, шөнийн гэрэлт гудамж болгон энэ сарын 9-нд гудамжны нээлтийг хийсэн. Гэвч тус гудамжийг Сөүлийн хотын захиргаанаас ирүүлсэн шаардлагын дагуу эргүүлэн буулгаж байгаа тухай мэдээлэл цахим хуудсаар тархаад байна.

Энэ талаар Нийслэлийн захирагчийн ажлын албаны мэргэжилтнээс тодруулахад “Сөүлийн хотын захиргаанаас шаардлага ирүүлээгүй. Мөн шөнийн гудамжийг буулгаж, шинээр дахин тохижуулж байгаа асуудал байхгүй” хэмээлээ. 

Нийслэлийн Засаг дарга бөгөөд Улаанбаатар хотын захирагч С.Батболд гудамжны нээлтэд оролцохдоо хэлсэн үгэндээ гудамжны тохижилт бүрэн дуусаагүй. Цаашид шат дараатайгаар тохижилтийн ажлыг гүйцэтгэж дэлхийн жишигт нийцсэн шөнийн гудамж болгоно гэдгийг хэлж байсан. Гудамжийг буулгаж байгаа бус тохижилтийн ажил дуусаагүй байгаа тул ажил хэвийн үргэлжилж байгаа аж. Удахгүй болох улсын баяр наадмаас өмнө эдгээр тохижилтын ажлыг бүрэн дуусгахаар төлөвлөжээ. Төлөвлөсөн ажлын 80 гаруй хувь нь хийгдээд явж байна. Наадам гэхэд бүрэн дуусах боломжтой гэдгийг Нийслэлийн Захирагчийн ажлын албаны мэргэжилтэн хэллээ.

Албан бус эх сурвалж гүйцэтгэгч компани гудамжны тохижилтын ажлыг дутуу гүйцэтгэсэн тул компанийг сольж, дахин тохижилт заслын ажлыг гүйцэтгэх болсон тухай мэдээлсэн. Энэ талаар мэргэжилтэн “Гүйцэтгэлийн ажлыг хийхээр олон компани төслөө танилцуулсан. Шаардлага хангаагүй хувийн компаниуд өөрийн хөрөнгөөр  тохижуулснаа буулгасан. Түүнээс татварын мөнгийг үр ашиггүй зарцуулсан зүйл байхгүй” хэмээлээ.

Нийслэлийн гудамжийг бий болгоход 1.5 тэрбум төгрөг зарцуулахаар төсөв батлагдсан. Энэхүү хөрөнгөөр Нийслэлийн Хот төлөвлөлт, ерөнхий төлөвлөгөөний газрын боловсруулсан зургийн дагуу 440 метр урт газрын сул шороон хөрс бүхий талбайг хатуу хучилттай болгож явган замыг нэмэгдүүлэх, олон нийтэд зориулсан үзвэрийн дэлгэц, амралтын суудал бий болгох, ногоон байгууламжийн нөхөн сэргээлт, сэлгэлт, авто зам болон явган замын гэрэлтүүлэг, гэрлэн чимэглэл зэрэг орчны тохижилтын ажлыг хийнэ гэдгийг албаныхан мэдээлсэн.

Гэвч шөнийн гудамж иргэд, залуусийн сэтгэлд нийцээгүй гэдгийг олон нийтийн цахим сүлжээгээр “хөвөрч” байгаа сэтгэгдэл, мэдээллүүдээс харж болно. Таалагдсан таалагдаагүй 1.5 тэрбумаар гудамж “боссон”. Гэвч “буулгаж байна” гэх мэдээллүүд бас л олон нийтэд таалагдсангүй. Гэхдээ энэ нь худал мэдээлэл болохыг албаны хүн хэллээ.

Тун удахгүй тохижилтийн ажил бүрэн дуусч, дэлхийн жишигт нийцсэн шөнийн гудамжаар бид таавар алхана гэдэгт итгэж, хүлээх л үлдлээ.

Г.Тэгшсүрэн