Монгол Улсын Ерөнхийлөгчийн ээлжит сонгуулийн санал хураалтын явц үргэлжилж байна. Сонгуультай холбогдуулан ЦЕГ-ын тэргүүн дэд дарга П.Батбаатар, Хэвлэл мэдээллийн төвийн дарга Н.Ганбадрал нар мэдээлэл хийлээ.

Цагдаагийн байгууллагаас сонгуультай холбоотой 649 гомдол мэдээллийг хүлээн авч, шалгаж байгаа юм байна. Тухайлбал өнөөдөр /2017.06.26/ ХУД-ийн 15 дугаар хорооны санал хураах байранд  иргэн Т санал өгөхөөр ороход саналын хуудсыг өгөхдөө зохион байгуулагч давхар наалдчихсан саналын хуудас өгсөн зөрчил гарчээ.  Иргэн энэ талаар зохион байгуулагчид хэлж, ажиглагч нарыг байлцуулан давхар олгогдсон хуудсыг хүчингүйд тооцож, хуулийн дагуу шийдвэрлэсэн байна. Үүний дараа АН-ын гишүүн Л.Энхбаяр, УИХ-ын гишүүн асан Эрдэнэчимэг нар хэвлэл мэдээллийн хэрэгсэл дуудан, бичлэг хийж, санал хураалтыг будилаантуулж байна гэх мэдээллийг олон нийтэд тарааасан тухай ЦЕГ-ын тэргүүн дэд дарга П.Батбаатар мэдээллээ.

Мөн “Талх чихэр” ХХК-ийн байранд утас булаалгасан хэргийн талаар мэдээлэл ирсэн. Дуудлагын дагуу СХД-ийн цагдаа нар очиход  сэтгүүлч Мөнхбаясгалан тэргүүтэй хүмүүс тухайн компанийн эд зүйлсийг нь хураах гэж байсан ташаа мэдээллийг олон нийтэд цацсан гэдгийг тэрбээр хэллээ.

Өчигдөр сошиал хуудсаар 360 орчим иргэн давхар санал өгөх гэж байгаа тухай мэдээлэл цацагдсан.  ОӨУБЕГ-аас цагдаагийн байгууллагад хүсэлт тавьсны дагуу  шалгахад давхар иргэний үнэмлэх олгогдсон мэдээлэл тогтоогдоогүй Мөн саналын хуудсын зургийг авсан зөрчил сошиал хуудсаар тархаад байгаа ч энэ талаар гомдол мэдээлэл цагдаагийн байгууллагад ирээгүй. Шалгаж байгаа  гэдгийг ЦЕГ-аас мэдээллээ.

ЦЕГ-ын тэргүүн дэд дарга П.Батбаатар “Сонгуулийн санал авах хэсгийн 1983 хороодын байранд цагдаагийн алба хаагчид өндөржүүлсэн бэлэн байдал зарлан ажиллаж байгаа. Алба хаагчид 7 хоногийн өмнөөс санал хураах байрыг 24 цагийн хамгаалалтад авч ажиллаж байна. Цагдаагийн алба хаагчдыг маань нам эвсэл холбоодын хүнийг өмөөрлөө зэргээр хэлж, шүүмжилж байна. Цагдаагийн байгууллагын алба хаагчид хууль зөрчсөн үйлдэл тогтоогдоогүй. Цагдаа нар аль нэг улс төрийн нам, хүчнийг дэмжээд байгаа талаар ташаа мэдээлэл тархаад байна” хэмээлээ.

Г.Тэгшсүрэн