НҮБ-д суух АНУ-ын элч Никки Хэйли Хойд Солонгос улс зургаа дахь удаагаа цөмийн туршилт хийсэнтэй холбогдуулан Аюулгүй зөвлөлийн хуралдааны үеэр мэдэгдэл хийлээ.

Тэрбээр “Хойд Солонгос томоохон хэмжээний дайн хийхийг хүсээд байна. Тэрбээр хөрш орнууд болон АНУ-ыг уг дайндаа татан оролцуулахын тулд удаа дараа өдөөн турхирсан үйлдэл хийх боллоо. Тэд биднээс дайн хийхийг гуйгаад байна. Тус улсын эсрэг хамгийн хатуу хориг тавьсан цагт тэд үнэнтэй нүүр тулах болно” гэж хэлжээ.

НҮБ түүхэндээ байгаагүй хатуу хоригийг Хойд Солонгосын эсрэг хэрэгжүүлж буй билээ.  Тус улсын гадаад дансыг царцаах, гадаадын орнуудад зорчихыг хориглох, тусламжаа зогсоохоос гадна баллистик пуужин болон цөмийн зэвсэг үйлдвэрлэхэд шаардлагатай нүүрс зэргийг нийлүүлэхийг олон улсад хориглоод буй билээ.

Хойд Солонгос өнгөрсөн долоо хоногийн эхээр Японыг чиглэн пуужин харвасан бол өчигдөр цөмийн туршилт хийсэн юм. Уг цөмийн туршилтын үеэр хөрсөнд 6.3 магнитудын хүчтэй газар хөдлөлт болсон бөгөөд уг чичирхийлэл Япон, Хятадад хүртэл мэдрэгджээ. 

Б.Дэлгэрцэцэг