1992 онд  Испанийн Барселона хотод болсон Олимпийн наадмаас МУГТ Д.Мөнхбаяр хүрэл медальт хүртсэн нь Буудлагын спортоор Олимпоос авсан манай тамирчдын анхны медаль байсан юм. Тэгвэл энэхүү баярт үйл явдлын 25 жилийн ой энэ онд тохиож байна.

Энэ ойг тохиолдуулан S Sport Mongolia нэртэй төрийн бус байгууллагаас санаачилан нэгэн сонирхолтой тэмцээнийг хийхээр болжээ. Энэхүү тэмцээн нь МУГТ Д.Мөнхбаярт хүндэтгэл үзүүлэх халз тэмцээн байх бөгөөд тэмцээнд урилгаар Олимпийн хошой аварга Болгарын Мария Гроздева, Олимп, Дэлхийн аварга Сербийн Ясна Секарич мөн Олимп, Дэлхийн аварга Гүржийн Нина Слауквадзе нарын Дэлхийн шилдэг тамирчид оролцохоор ирээд байгаа аж.

Мөн уг тэмцээнд Олимпийн хошой хүрэл медальт, Дэлхийн хошой аварга Д.Мөнхбаяр ,ОУХМ Ц.Мөнхзул нарын шилдэг тамирчид оролцох аж.

Тэмцээн энэ сарын 17-ны өдөр 11:00 цагаас “Алдар” спорт хорооны “Аварга” клубт зохион байгуулагдах юм. 

Г.Баяраа