ОХУ-ын зэвсэгт хүчний дэслэгч генерал Валерий Асапов Сирийн Дэйр эз-Зор хотноо амиа алдсан талаар тус улсын Батлан хамгаалах яамны мэдээллээс иш татан “www.inforesist.org”  сайт мэдээллээ.

Генералыг Дэйр эз-Зор хотноо ирэх үед Сирид хяналтаа тогтоохыг санаархаж буй Иракийн хэт даврагч Халифатын вант улс бүлэглэл гэнэтийн довтолгоо хийсэн байна. Уг довтолгооны үеэр генерал шарх авч, эмнэлэгт хүргэгдсэн боловч амиа алдсан талаар яамны мэдээлэлд дурьджээ.

Генерал Сирийн армийн удирдлагуудад зөвлөгөө өгөхөөр тус хотноо ирсэн байсан гэнэ. Тэрээр террористуудын эсрэг тэмцэж буй армийнханд цэргийн зөвлөгөө өгдөг эрхмүүдийн нэг байжээ.

Дээрх мэдээллийн дараа ОХУ-ын Засгийн газар амиа алдсан генералд Төрийн одонгоор нэхэн шагнахаар болсон байна.

ОХУ-ын өнгөрсөн 2015 оны есдүгээр сараас Сирид цэргийн ажиллагаа явуулах болсон бөгөөд энэ хугацаанд Оросын цэргийн 37 хүн амиа алджээ.

Б.Дэлгэрцэцэг