Бүгд Найрамдах Чечень улсын Ерөнхийлөгч Рамзан Кадыровын албан ёсны фэйсбүүк болон инстаграм хуудас нь хаагдсан талаар “TASS” агентлаг мэдээллээ.

Түүний фэйсбүүк хуудсыг нь 750 мянган хэрэглэгч, харин инстаграм хуудсыг нь 3 сая хүн тус тус дагадаг аж.

Кадыров албан ёсны сошиал хаягууд нь хаагдсан явдлын ард АНУ-ын Засгийн газар бий хэмээн мэдэгдэж, тайлбар шаардсан байна.

Вашингтоны эрх баригчид өнгөрсөн долоо хоногт Чечений тэргүүнийг АНУ-д зорчихыг хориглосон юм.

Ерөнхийлөгч “Энэ сарын 23-наас эхлэн би инстаграм, фэйсбүүк рүүгээ нэвтрэх боломжгүй болсон. Энэ хоёр байгууллагын удирдлагууд Вашингтоны заавраар хэрэглэгчийнхээ эрх ашгийг уландаа гишгэлээ” гэж мэдэгджээ.

Дээрх асуудлаас болж ОХУ-ын харилцаа холбооны зохицуулах байгууллага Фэйсбүүк компанид албан бичиг илгээж, Кадыровын албан ёсны хаягуудыг хаасан шалтгаанаа тайлбарлахыг хүсчээ.

Б.Дэлгэрцэцэг