"Торажи" гэх хүчтэй хар салхи өнгөрөгч амралтын өдөр Вьетнам улсыг дайран өнгөрч, их хэмжээний хохирол учруулсан талаар "www.aljazeera.com" мэдээллээ. 

Уг байгалийн гамшгийн уршгаар 12 хүн амиа алдсан гэнэ. Агаарын тээвэр болон галт тэрэгний үйлчилгээ тасалдаж, алслагдсан бүс нутагт амьдарч буй иргэд тог цахилгаангүй болжээ. 

Хан Хао мужид хөрсний нуралт үүссэн ба эрх баригчид гамшгийн голомт руу цэргийн албан хаагчдыг илгээх шийдвэрийг гаргасан байна.

Тус мужид өнгөрөгч онд Дамри гэх хар салхи дэгдэж, 27 хүн амиа алдсан түүхтэй. 

Энэ онд зөвхөн байгалийн гамшгийн уршгаар 185 хүн амиа алдаж, хагас сая иргэн орон гэрээ алджээ. 

Б.Дэлгэрцэцэг