Казахстаны анхны ерөнхийлөгч Нурсултан Назарбаев улс орныхоо тогтвортой байдлын төлөө огцрох шийдвэр гаргасан гэж мэдэгджээ. 

“Энэ онд гаргасан миний шийдвэр нухацтай шүүн тунгаасан, улс орныхоо тогтвортой байдал, ирээдүй, улс төрийн залгамж холбооны төлөө гаргасан шийдвэр байсан юм” хэмээн Назарбаев мэдэгдснийг Риа Новости агентлаг мэдээллээ. 

Түүнчлэн өөрийнх нь энэ шийдвэрт бусад орны төрийн тэргүүнүүд хандаж байсан хандлагыг “гайхалтай байсан” гээд “эрх мэдлийг дамжуулах асуудлыг хэрхэн шийдэхийн үлгэр жишээ болсон” гэж мэдэгдсэн байна. 

Эргэн сануулахад, энэ оны гуравдугаао сарын 19-нд  Назарбаев Казахстаны Ерөнхийлөгчийн албан тушаалаас буух болсноо мэдэгдсэн юм. Ийнхүү  тус улсыг 30 жил орчим удирдсан Назарбаев гэнэт ийм шийдвэр гаргах болсныг ажиглагчид янз бүрээр тайлбарлаж байлаа.

Эрүүл мэндийн шалтгаанаар ажлаа өгсөн гэж үзэх нэгэн нь байсан бол 2016 онд хөрш Узбекистанд Ислам Каримов гэнэт таалал төгссний дараа тус улсын улс төрийн хүрээллийнхний дунд Каримовыг орлох хүнийг тодруулах ил далд өрсөлдөөн газар авч, хямрал нүүрлэх дөхсөн нь Назарбаев амьд ахуйдаа засаглалын халааг шилжүүлэх нь зөв гэж ийм шийд гаргасан гэж үзэх ажиглагчид ч байсан юм. 

 

Г.Бямбасүрэн