Монгол Улсын Төрийн албаны зөвлөл, НҮБ-ын Хөгжлийн хөтөлбөртэй хамтран хэрэгжүүлж буй “Монгол Улсад мэргэжлийн, иргэн төвтэй төрийн албыг төлөвшүүлэх нь” төслийн дэмжлэгтэйгээр ажлын хэсэг Канад Улсын төрийн байгууллагын үйл ажиллагаатай танилцаж, туршлага судаллаа.

Төрийн албаны зөвлөлийн дарга Б.Баатарзоригоор ахлуулсан ажлын хэсэг Канад Улсын Төрийн албаны комисс, Төрийн сангийн зөвлөл, Хүний нөөцийн удирдлагын газар, Гадаад харилцааны яам, Тэргүүн түшмэлийн газар, Төрийн удирдлагын сургууль, Чөлөөт агентийн үйл ажиллагаатай танилцаж, Төрийн албаны комиссын хяналт шалгалт хариуцсан дэд ерөнхийлөгч Stan Lee, Сонгон шалгаруулалт хариуцсан захирал Patrick Gauthier болон Төрийн сангийн зөвлөлийн дэд сайдын шадар туслах Jean Francois Fleury, гүйцэтгэх захирал Nadiane Huggins зэрэг албаны хүмүүстэй уулзалт хийв.

Туршлага судлах энэхүү айлчлалыг Монгол Улсаас Канад Улсад суугаа элчин сайдын яам, Канад Улсын Төрийн удирдлагын институт хамтран зохион байгууллаа.

Канад Улсын Төрийн албаны тогтолцоо 100 гаруй жилийн түүхтэй бөгөөд Улсын хэмжээнд 503.6 мянган төрийн албан хаагч ажиллаж байгаагаас 208.3 мянга нь төрийн захиргааны ажил эрхэлж байна.

Мөн Канад Улсын Төрийн албаны комисс нь 2008 онд Монгол Улсад төрийн албаны шинэтгэлийг хэрэгжүүлэхэд томоохон дэмжлэг үзүүлж байгаа бөгөөд Монгол Улсын Төрийн албаны зөвлөл, Канад Улсын Төрийн албаны комисс хооронд хамтран ажиллах санамж бичгийг 2010 онд байгуулсан билээ.