Нийслэл энэ оны хоёрдугаар сарын 26-наас хойш С.Амарсайхан гэдэг Засаг даргатай болсон. Тэр даргад “Ёслол хүндэтгэлийн гэрэгэ”-г бүтээн гардуулахаар НИТХ-аар шийдвэрлээд байгаа. 2004 оноос эхлэн үе үеийн хотын дарга нарт ёслол хүндэтгэлийн Гэрэгэ гардуулан өгдөг уламжлал тогтсон. Гэхдээ албан тушаалд очоод 10 сар ч болоогүй Засаг дарга нэр хүнд бүхий гэрэгэ гардахаар нийслэлийн өнгө төрх, өрх, гэрийг  үнэхээр сайн ажиллаж чадаж байгаа юу гэдэг эргэлзээтэй. Нураа, зогсоо, болохгүй, хорь гэх баахан шийдвэр гаргасан. Бас болоогүй баг хамт олноо ч сольсон. Тэр нь ч дуусаагүй дахиад ч 2 даргыг хэдхэн хоногийн өмнө халсан.

Тодруулбал, өнгөрсөн баасан гарагт Нийслэлийн Засаг дарга С.Амарсайхан шуурхай хуралдаан зарлаж, өвөлжилт, зам тээврийн салбарын талаар асуудалтай танилцмагцаа, Агаарын бохирдлыг бууруулах газрын дарга Б.Цацрал, Авто замын хөгжлийн газрын дарга Ж.Тогтохбаяр нарыг чөлөөлсөн.

Б.Цацралыг өвөлжилтийн бэлтгэл ажлыг хангах, айл өрх бүрт сайжруулсан шахмал түлшийг түгээх, борлуулах, мэдээлэл зөвлөмжөөр хангах ажлыг удаа дараа хангалтгүй ажилласан гэж үзсэн бол Ж.Тогтохбаярыг хүйтний улирлаас өмнө зам, дэд бүтцийн бүтээн байгуулалтын ажлыг төлөвлөсөн хугацаанд хийж чадахгүй байгаа хэмээн халсан. Түүнчлэн хуралдааны үеэр Засаг дарга С.Амарсайхан “Асуудал байгаа бол тодорхой хэлэх хэрэгтэй. Та нөхөд ажил хийх, хэрэгжүүлэх бүх боломжоор хангагдсан. Өөрсдийн чадах, боломжтой байгаа хүрээндээ асуудлаа шийдэж ажиллах ёстой. Бүх асуудлыг хот шийднэ гэж харж сууж болохгүй” гээд цаашид ч холбогдох албан тушаалтнуудыг хариуцсан ажлаа төлөвлөсөн хугацаанд хариуцлагатай хийж хэрэгжүүлэхийг хатуу анхааруулж, цаашид эрхэлсэн ажилдаа хариуцлага алдсан хүмүүстэй ажлын хариуцлага тооцож ажиллана гэсэн.

Гэвч албан тушаалтнууд муу ажиллах бус хэрэгжүүлэх боломж муутай ажил төлөвлөсний горыг л амссан хэрэг. Тухайлбал, өвөл хаяанд ирсэн энэ үед сайжруулсан шахмал түлшний нөөц нь бага, зам засвар шинэчлэлийн ажил нь шөнийн цагаар хийгдэхэд оршин суугчдын амгалан тайван байдлыг алдагдуулах зэрэг хүндрэлүүд гарч байгаа. Тэдгээртэй яг нүүр тулж байгаа нь хэрэгжүүлэгч албан тушаалтнууд. Харин Засаг дарга бол “хөрсөн” дээр тулахгүй учраас хөндлөнгөөс ажиглаад, браво гэж хэлүүлэх хэмжээний агаарийн санаачилга гаргахаас хэтрэхгүй яваа. Тэгэхээр “Ёслол хүндэтгэлийн гэрэгэ”-ний эзэн болох даргын хувьд ард түмний эрүүл, аюулгүй амьдрах орчинд анхаарахаас илүү өөрийг нь муухай харагдуулах албан тушаалтнуудтай ажиллахгүй байхыг л эрхэмлээд байгаа бололтой.  

Эх сурвалж: Erennews.mn