Байгалийн түүхийн музейн барилгыг нурааж, газар дээр нь Чингис хааны музей байгуулах шийдвэрийг Засгийн газар гаргаж, зураг төсөв нь бэлэн болоод буй. Харин энэ шийдвэрийг соёлын өвийг устгалаа гэсэн эсэргүүцэгчид гарч ирсэн. БСШУС-ын сайд Ё.Баатарбилэг өнөөдөр Байгалийн түүхийн музейд очиж, нөхцөл байдалтай танилцан, хэвлэлийнхэнд мэдээлэл өглөө.

-Байгалийн түүхийн музейн барилгыг буулгах, шинэ музей байгуулах ажил ямар шатанд яваа вэ?

БСШУС-ын сайдын 2013 оны шийдвэрээр Байгалийн түүхийн музейг буулгаж, шинээр барихаар болсон. Тухайн үед тендер зарлагдаж, Балданс компани зураг төсөл боловсруулсан. Энэ зургийг дахин боловсруулж, сайжруулаад энэ газарт Чингис хааны музей байгуулах шийдвэрийг гаргасан.

Харамсалтай нь энэ ажил явагдаж байтал газрын асуудал гарч ирлээ. 1998 онд музейд ажиллаж байсан хүн газрыг эзэмшиж байгаад өмчлөлдөө авсан байна. Хотын удирдлагуудтай газрын асуудал яригдаж байна.

-Энэ барилгыг заавал буулгах шаардлагатай юу?

-Энэ музейн барилгыг буулгаж, шинээр Чингис хааны музей байгуулахаас өөр арга байхгүй. Техникийн норм, барилгын стандарт бүгд зөрчигдсөн. Энэ барилга нурах хэмжээнд хүрчихээд байхад улстөржүүлж, санаатай санаагүй мушгин гуйвуулж Соёлын үнэт өв мэтээр тайлбарлаж байгаад харамсаж байна. Сүүлийн хэд хоног энд суулт хийж, олон нийтийг турхирч байна. Би анхааралтай ажиглалаа. Буулгахгүй л гээд байна. Яаж сэргээн засварлах боломжийн талаар хэн ч ярихгүй байна.

-Мэргэжлийн архитекторууд эсэргүүцэж байна шүү дээ.

-Архитекторууд Улаанбаатар хотын төв хэсэг, баганат барилга, шинэ классик үагвар гэж ярьдаг. Тэгвэл Төрийн ордны зүүн талд байгаа 1920 оны улсын хэвлэх үйлдвэрийн барилгыг хувийн компани аваад, бүгдийг нь буулгаад шинээр огт өөр барилга барьж байхад юу ч дуугараагүй архитекторууд өнөөдөр төр юмаа мэдээд, хөрөнгө оруулалт хийгээд шинэ музейтэй болохыг яагаад жадлан эсэргүүцэж байгаа юм бэ. Энэ хүмүүс ямар санаатай эсэргүүцэж байгаа юм бэ. Улстөржилт биш байгаасай.

-Энэ газарт Байгалийн түүхийн музейг байгуулахгүй байх шалтгаан юу вэ?

-Байгалийн түүхийн музейг Их тэнгэрийн аманд томоохон талбайд барина. Учир нь том том үлэг гүрвэл, батаарын яснуудыг багтаах ёстой. 40 000 мкв-тай музей бол таван га-гаас илүү газрыг эзэлнэ. Тиймээс ирэх жил Их тэнгэрийн аманд энэ музейн ажлаа эхлүүлнэ.

-Эсэргүүцэл соёлын салбарын хөрөнгө оруулалтыг зогсоох хэмжээнд хүрсэн гэж үү?

-Соёлын салбарт 1990 оноос хойш хийгээгүй хөрөнгө оруулалт. Төв номын сан, ДБЭТ, УДЭТ-ийн барилгын зургийг эхлүүлж, хөрөнгийн тодорхой хувийг Засгийн газрын нөөцөөс гаргаж, ирэх жилээс шинэчлэлийн ажлыг эхлүүлэх гэж байсан. Гэтэл нэр бүхий улстөрчид, урлаг соёлын зүтгэлтнүүд, архитекторчид, ТББ, иргэд энэ гурван барилгыг шинэчлэх ажлыг явуулахгүй гэж эсэргүүцэж байна.

2020 оны төсвийн тухай хуулинд Төв номын сан, ДБЭТ, УДЭТ-ийн барилгад 12 тэрбум төгрөг суулгасан. Одоо энэ улстөржилт хэрээс хэтэрч, соёлын байгууллагуудын хөрөнгө оруулалтыг зогсоохоос өөр аргагүй боллоо. Би Сангийн сайд болон Төсвийн байнгын хорооны дарга хоёрт өнөөдөр санал хүргүүлэх тухай бичиг өгч байна. Энэ 12 тэрбум төгрөгийг боловсрол, спорт, шинжлэх ухааны тулгамдсан асуудалд шилжүүлж өгөөч гэсэн саналыг хүргүүлж байна. Соёлын  салбарын хөрөнгө оруулалтыг зогсоох санал, харамсалтай байна. Би энэ саналаа Ерөнхий сайд, Засгийн газарт танилцуулна.

-Энэ ажил ингээд бүрэн зогссон гэж ойлгож болох уу?

-Цаашид бид энэ гурван барилга дээр олон улсын шинжээчдийн баг ажиллуулна. Гэхдээ энэ маш их хөрөнгө, хугацаа орно. Энэ хугацаанд энэ барилгуудад ноцтой гэмтэл учирч, олон нийтэд эрсдэл учруулсан тохиолдолд энэ асуудлыг эсэргүүцсэн хүмүүс хариуцлага хүлээх ёстой.

Б.Энэрэл