ГХ-ны сайд Д.Цогтбаатар цаг үеийн асуудлаар сэтгүүлчдийн асуултад хариулав.

-Франц улсад суугаа Элчин сайд А.Баттөр оффшор бүсэд мөнгө угаасан асуудлаар хилийн хориг тавиад байгаа. ГХЯ-нд энэ талаар ямар мэдээлэл ирсэн бол?

-Бид хууль хүчний байгууллагатай хамтраад гадаадад суугаа Элчин сайдын яамдад хяналтаа тавиад явж байгаа. Энэ шалгалтын дүнд янз бүрийн зүйл гарч байгаа байх. Бидэнд мэдээлэл өгөөгүй. Хууль, хяналтын байгууллага өөрийнхөө эрх бүхий хяналт шалгалтаа хийгээд явж байгаа. Хил давах эсэх дээр тодорхой хэмжээний хяналт тавьсан гэдэг мэдээлэл бидэнд албан ёсоор өгсөн. Энэ асуудал шүүхээр орж шийдвэрлэгдээгүй байгаа учир шалгалт явагдах ёстой. Манай яамны зүгээс дэмжлэг үзүүлж ажиллана. Бид мөрдөн байцаах шатанд саад болохгүй. Хэрвээ эрүүгийн хэргийн шинжтэй бол хариуцлагын асуудал гарч ирнэ. Бид европт байгаа машин бүрийг хянаж байгаа.

-А.Баттөр хэзээ сайдаар томилогдсон бэ?

-Намайг ГХ-ны сайд болохоос өмнө Элчин сайдаар томилогдсон байсан.

-Гадаад улсад хууль бус үйлдэл хийсэн дипломатуудад ямар хариуцлага тооцож байна вэ?

-Хууль бус үйлдэл хийсэн бол хариуцлага тооцож, ял хүлээнэ. Саяхан хоёр хүн баригдсан. Германд шалгуулж байна. Тухайн улсын хуулиар ял хүлээнэ.

-Дипломат албыг хэрхэн чанаржуулах вэ?

-Боловсон хүчний томилогоог бид анхаарах хэрэгтэй. Цоорхой байгаа. Эхнээс нь нарийн мэргэшүүлэх хэрэгтэй. Тэр дундаа олон улсын эрхзүй дээр тусгайлан бэлтгэх хэрэгтэй. Өнөөдөр Монгол Улс даяаршиж байна. Тэр дотор маргаантай зөндөө асуудал байгаа.

-Зарим орны Элчин сайдууд томилогдоогүй байгаа. Хэзээ оруулж ирэх бол?

-Одоо 10 гаруй Элчин сайдын асуудал орж ирнэ. Хугацаа нь дуусгавар болж байгаа.

-Саарал жагсаалтад орсонтой холбоотой ямар ажил хийгдэж байгаа бол?

-Энэ асуудлын ихэнх нь манай дотоодын хууль тогтоомжтой холбоотой асуудал. Ерөнхий сайдын захирамжаар ажлын хэсэг байгуулагдсан. Мэдээллээ бүрэн авах боломжтой.

Н.Нягт