Төрийн албаны чиг, үүргийг үнэнч шударга, идэвх санаачлилгатай биелүүлж, төрийн үйл хэрэгт бодитой хувь нэмэр оруулсныг өндрөөр үнэлж, Төрийн албаны зөвлөлөөс шинэ оны эхний ажлын өдөр буюу 2020 оны 01 дүгээр сарын 2-ны өдөр гавьяат хуульч, хууль зүйн ухааны доктор, хошууч генерал Б.Пүрэвт Төрийн албаны тэргүүний ажилтан цол, тэмдгийг олгож мөн хүндэтгэлийн уулзалтыг зохион байгууллаа.

Тэрээр БНМАУ-ын Сайд нарын зөвлөлийн Зохион зааварлах хэлтсийн дарга, Аймгийн засаг дарга, Цагдаагийн ерөнхий газрын дарга, Монгол Улсын Ерөнхийлөгчийн хуулийн бодлогын зөвлөх зэрэг төрийн албаны өндөр хариуцлагатай үүргийг олон жил гүйцэтгэхдээ хуримтлуулсан арвин туршлага, дурсамжаасаа Төрийн албаны зөвлөлийн дарга, гишүүд, ажлын албаны хамт олонд ярьж, төрийн албаны өнөөгийн шинэтгэлийг хэрэгжүүлэхэд анхаарах асуудлуудын талаар санал бодлоо хуваалцав.

Хошууч генерал Б.Пүрэв, “Шинэчлэн найруулсан энэ удаагийн Төрийн албаны тухай хууль нь төрийн албыг цэгцрүүлэх талаар иргэдийн хүлээлт үүсгэсэн хууль болж чадсан гэдгийг онцлон тэмдэглээд, юуны өмнө төрийн албан хаагчдаа энэ шинэчлэлд хөл нийлүүлж бэлтгэхэд анхаарах нь зүйтэйг зөвлөв.

Монгол төрийн алба даяарчлалын энэ үед монгол хэл, монголын түүх, монгол ахуйгаа сайн мэдэж, төрийн албан хаагч болгон өөрийн соёл, уламжлалд суурилсан мэдлэг чадвартай байж, орчин цагийн боловсрол, технологийн хөгжилтэй хослуулахын чухлыг онцоллоо.