Засгийн газрын хуралдаанаар өчигдөр /2020.01.19/ Монгол Улсын хилийг хэсэгчлэн хаах шийдвэр гарсан.

Ингэхдээ Монгол Улстай хиллэдэг БНХАУ-ын бүх боомтуудаар /агаарын, төмөр замын, автозамын/ Хятад иргэд болон Хятад улсаар дамжин ирж буй гадаад улсын иргэдийг нэвтрүүлэхгүй. Мөн гуравдугаар сарын 2-ныг хүртэл Монгол Улсын иргэд урд хөрш рүү явахыг хориглох шийдвэр гаргасан.

Урд хөрштэй хиллэдэг бүх боомтуудаар Монгол иргэдээ хоёрдугаар сарын 6-ныг хүртэл нэвтрүүлэх бол гуравдугаар сарын 2-ны өдрийг хүртэл Буянт-Ухаа болон Замын-Үүдийн боомтуудаар буцаж ирж буй Монгол иргэдээ нэвтрүүлнэ. Харин бараа таваарын импорт, экспортыг хязгаарлахгүй гэдэг шийдвэр гарсан.

Хилийн нөхцөл байдал, иргэдийн зорчилт хөдөлгөөний талаар ХХЕГ-ын хилийн боомт аюулгүй байдал, шалган нэвтрүүлэх газрын дарга Ц.Мягмардорж мэдээлэл өглөө.

Тэрбээр "Агаарын замын боомтын хувьд Хонконг-Улаанбаатар чиглэлийн нислэг үйлдсэн. Энэ нислэгээр Монгол Улсын 49 иргэн холбогдох зөвшөөрлийг авч улсын хилээр нэвтэрсэн. Мөн Улаанбаатар-Эрээн чиглэлийн галт тэрэг улсын хилээр нэвтэрсэн. Энэ галт тэрэгээр зорчихоор 36 монгол иргэн тасалбар авсан байсныг холбогдох шийдвэрийн дагуу улсын хилээр нэвтрүүлээгүй. Ухань хот руу нислэг үйлдээд ирсэн тусгай үүргийн нислэг хийсэн онгоцны шалгалт дууссан. Хил хамгаалах байгууллага эдгээр иргэдийн шалгалтыг хялбаршуулсан журмаар зохион байгууллаа.

Олон улсын галт тэрэгний хувьд асуудал үүсч байна. Тухайлбал Бээжин-Улаанбаатар-Москва, Москва-Улаанбаатар-Бээжин чиглэлийн транзит галт тэрэгээр зорчиж байгаа гадаадын иргэдийг Монгол Улсын нутаг дэвсгэрт буулгахгүй, дамжин өнгөрч байгаа гадаадын иргэдийг улсын хилээр чөлөөтэй нэвтрүүлж байна" гэлээ.

Монгол Улсын хилээр Өчигдөр /2020.01.318/ 1109 монгол иргэн орж ирж 450 иргэн гадагш хил нэвтэрсэн байна.

Г.Сүрэн