Долоо хоногийн өмнө л гар ариутгагч, амны хаалтны хомсдол үүсгэж хуйгаар нь хамаад байсан монголчууд хаачив?

Урд хөршид титэм вирусийн халдвар хурдацтай тархсан хэвээр өвчилсөн хүний тоо 20 мянгыг давж, 425 хүн нас барсан гэх харамсалтай тоон мэдээлэл байна. Эрсдэл ийм өндөр, титэм хэмээх тоогүй вирус манай хаалгыг тогших ч үгүй хэзээ л бол хэзээ урилгагүй хүрээд ирж мэдэхээр байхад монголчууд харин тайвширчихлаа.

Манайхан угаас аливаа асуудалд гурав хоног л анхаарал хандуулдаг хүмүүс. Харин дэлхийг цочроосон вирусийн тухай долоо хоног “сэвлээ”. Удахгүй хил хааж хүнсний хомсдол үүснэ гэх айдаст автаж “Хүчит шонхор” зах руу урт түгжрэл үүсгэээд амжсан хэр нь өнөөдөр амны хаалтаа зүүхээ больчихож.

Гадуур алхаж яваа гурван хүн тутмын нэг нь л амны хаалттай. Өглөө орсон хоёр ч дэлгүүрийн худалдагч амны хаалтгүй. Автобусанд чихцэлдсэн олон дунд ахимаг насны ах нарын ихэнх нь амны хаалтгүй байх нь айдас төрүүлнэ.

Монголд одоогоор титэм вирус бүртгэгдээгүй хэмээн Эрүүл мэндийн яамнаас мэдээлж буй. Гэвч энэ тайвшрах үндэслэл биш. ДЭМБ-аас вирус тархсан орныг улаанаар, вирус халдварласан байж болзошгүй улс орныг шараар тэмдэглэсэн дэлхийн зурагт манай орныг бүхэлд нь улаанаар бүрхсэн байгааг та харж байна. Улмаар манай улсыг "эрсдэл өндөртэй" орон хэмээн ДЭМБ-аас үзэж байгаа.

Мэддэг тарниа уншаад муу бүхэн холуур байг хэмээн залбирч суухаас өөр арга бидэнд алга. Хэрэв гайхал вирус манай улсад нэгэнт ороод ирвэл бидэнд вирусийг дарж авах тоног төхөөрөмж дутагдах магадлалтай гэдгийг эмнэлгийн байгууллагууд мэдээлж байна. Гэтэл иргэд амны хаалтгүй алхсаар л...Манайхан дэндүү амар тайван хүмүүс юм.

Долоо хоногийн өмнөх шигээ дор бүрнээ идэвхийлэн маскаа зүүе. Гараа угаая, гадуур гарахгүй байя.

Б.Итгэл